Border News Agency
နေပြည်တော်၊ ဧပြီ ၂၅။
စစ်ကော်မရှင်တပ်က ဇူလိုင်လကုန်အထိ ငြိမ်းချမ်းရေးဆွေးနွေးဖို့ ဖိတ်ခေါ်ထားတာဟာ တော်လှန်ရေးအင်အားစုတွေကို သပ်လျှိုသွေးခွဲဖို့ ကြိုးပမ်းတဲ့အတုအယောင်လုပ်ရပ်သာဖြစ်တယ်လို့ အမျိုးသားညီညွတ်ရေးအတိုင်ပင်ခံကောင်စီ (NUCC) က ဧပြီလ ၂၅ ရက်၊ ဒီနေ့ ထုတ်ပြန်ပါတယ်။
အဲဒီဖိတ်ခေါ်ချက်ဟာ ပျက်ပြယ်သွားပြီဖြစ်တဲ့ ၂၀၀၈ ဖွဲ့စည်းပုံနဲ့ NCA လမ်းကြောင်းကို အသုံးချပြီး စစ်ခေါင်းဆောင်တွေကျူးလွန်ထားတဲ့ ရာဇဝတ်မှုတွေအတွက် ပြစ်ဒဏ်ကင်းလွတ်ခွင့်ရဖို့နဲ့ နိုင်ငံရေးအရ တရားဝင်မှု ရှာကြံတာသာဖြစ်တယ်လို့ ဆိုပါတယ်။
စစ်အာဏာရှင်စနစ် အမြစ်ပြတ်ဖို့အတွက် စစ်တပ်က နိုင်ငံရေးမှာပါဝင်နေတာကို အဆုံးသတ်ရမှာဖြစ်သလို လက်နက်ကိုင်တပ်ဖွဲ့အားလုံးဟာ အရပ်သားအစိုးရရဲ့ အုပ်ချုပ်မှုအောက်မှာပဲ ရှိရမယ်လို့ NUCC က သူတို့ရဲ့ ဘုံနိုင်ငံရေးဦးတည်ချက်ကို အလေးပေး ပြောဆိုထားပါတယ်။
ဒါ့အပြင် ၂၀၀၈ ဖွဲ့စည်းပုံကို အပြီးတိုင်ဖျက်သိမ်းပြီး အားလုံးလက်ခံနိုင်တဲ့ ဖက်ဒရယ်ဒီမိုကရေစီ ဖွဲ့စည်းပုံအခြေခံဥပဒေသစ်နဲ့ ပြည်ထောင်စုသစ် တည်ဆောက်ဖို့၊ ကျူးလွန်ခံရသူတွေအတွက် တရားမျှတမှုဖော်ဆောင်ဖို့ကိုလည်း တိုက်တွန်းထားပါတယ်။
စစ်ကော်မရှင်တပ်ဟာ ငြိမ်းချမ်းရေးဆွေးနွေးပွဲတွေကို အာဏာဆုပ်ကိုင်ဖို့ လက်နက်သဖွယ်အမြဲအသုံးချခဲ့တာကြောင့် အခုကမ်းလှမ်းမှုကို လုံးဝလက်ခံမှာမဟုတ်ဘဲ စစ်အာဏာရှင်စနစ် အမြစ်ပြတ်တဲ့အထိ ပြည်သူနဲ့အတူ ဆက်လက်တိုက်ပွဲဝင်သွားမယ်လို့ဆိုပါတယ်။
