Border News Agency
နေပြည်တော်၊ မေ ၈။
NLD အစိုးရဟောင်းလက်ထက်က တာဝန်ရှိသူတွေရဲ့ မဆင်မခြင်ဆောင်ရွက်မှုတွေကြောင့် နိုင်ငံတော်မှာ အမေရိကန်ဒေါ်လာ ၁၃ သန်းကျော်နဲ့ မြန်မာငွေ ဘီလျံ ၂၂၀ ကျော် ဆုံးရှုံးခဲ့ရတယ်လို့ သမ္မတတု မင်းအောင်လှိုင်က မေလ ၆ ရက်နေ့ကပြုလုပ်တဲ့ အစိုးရအဖွဲ့ အစည်းအဝေးမှာ စွပ်စွဲပြောဆိုလိုက်ပါတယ်။
နိုင်ငံ့ဝန်ထမ်းတွေအဂတိမလိုက်စားဖို့ မှာကြားတဲ့အချိန်မှာ အခုလို အစိုးရဟောင်းကို အပြစ်ပုံချ ပြောဆိုခဲ့တာပါ။
အဲဒီလို အဂတိလိုက်စားမှုတွေကြောင့် နိုင်ငံတော်က နစ်နာရတာဖြစ်လို့ ပြည်ထောင်စုအဆင့်ကနေတိုင်းနဲ့ပြည်နယ်အထိ တာဝန်ရှိသူတွေက ကြပ်မတ်ကြဖို့ သူက ဆိုပါတယ်။
ဒါ့အပြင်သူတို့အစိုးရဟာ ပြည်သူတွေ ရွေးချယ်ထားတဲ့ အစိုးရဖြစ်တာကြောင့် နိုင်ငံ့စီးပွား တိုးတက်အောင် လုပ်ပေးရမယ်လို့လည်း ပြောသွားပါသေးတယ်။
တချို့နိုင်ငံတွေက သူတို့အစိုးရအပေါ် စီးပွားရေးပိတ်ဆို့မှုတွေ လုပ်နေတာကိုလည်း ဒီမိုကရေစီနည်းကျ မဲပေးခဲ့ကြတဲ့ ပြည်သူတွေကို တန်ဖိုးထားဖို့လိုတယ်လို့ တုံ့ပြန်ခဲ့ပါတယ်။
တကယ်တမ်းမှာတော့ စစ်တပ်က အာဏာသိမ်းပြီးနောက်ပိုင်း နိုင်ငံခြားရင်းနှီးမြှုပ်နှံမှုတွေ ထွက်ခွာသွားတာ၊ငွေကြေးဖောင်းပွတာနဲ့ ကုန်ဈေးနှုန်းတက်တာတွေကြောင့် ပြည်သူတွေ အတိဒုက္ခရောက်နေတာကိုတော့ သမ္မတတုက ထည့်သွင်းပြောဆိုတာမရှိပါဘူး။
နိုင်ငံရေးလေ့လာသူတွေကတော့ အခုလို အစိုးရဟောင်းကို အဂတိမှုတွေနဲ့ အပြစ်တင်နေတာဟာ လက်ရှိသူတို့ရင်ဆိုင်နေရတဲ့ စီးပွားရေးကျဆင်းမှုတွေကို လမ်းကြောင်းလွှဲဖို့ ကြိုးစားတာသာဖြစ်တယ်လို့ ဝေဖန်နေကြပါတယ်။
