Border News Agency
ရန်ကုန်၊မေ ၈။
ကမ္ဘာ့နိုင်ငံတွေမှာ ဟန်တာဗိုင်းရပ်စ် (Hantavirus)ကူးစက်မှုတွေခပ်စိပ်စိပ် ဖြစ်လာနေပြီး ဒီဗိုင်းရပ်စ်က လူအချင်းချင်းပါ ကူးစက်နိုင်တဲ့ အခြေအနေရှိနေလို့ ကမ္ဘာ့ကျန်းမာရေးအဖွဲ့ (WHO) က အရေးပေါ် သတိပေးချက် ထုတ်ပြန်လိုက်ပါတယ်။
အာဂျင်တီးနားက ထွက်လာတဲ့ အပျော်စီးသင်္ဘောပေါ်မှာ စတင်ကူးစက်ခဲ့တာဖြစ်ပြီး အခုဆိုရင် အဲဒီသင်္ဘောပေါ်က ခရီးသည်တွေဟာ နိုင်ငံပေါင်း ၁၂ နိုင်ငံကျော်ကို အသီးသီး ပျံ့နှံ့သွားကြပြီ ဖြစ်ပါတယ်။
အဲဒီဗိုင်းရပ်စ်က ပုံမှန်ဆိုရင် ကြွက်တို့၊ ရှူးပျံတို့လို သတ္တဝါတွေရဲ့ ဆီး၊ မစင်နဲ့ တံထွေးတွေကနေတဆင့် လူကို ကူးစက်တာပါ။
ဒါပေမယ့် အခုနောက်ပိုင်း တောင်အမေရိကမှာတွေ့ရတဲ့ မျိုးကွဲတစ်ခုကတော့ အတူနေမိသားစုဝင်တွေ ဒါမှမဟုတ် အလွန်နီးကပ်တဲ့သူတွေကြားမှာ လူအချင်းချင်းပါ ကူးစက်နိုင်တာကို တွေ့ရှိထားပါတယ်။
အဲဒီဗိုင်းရပ်စ်ကြောင့် လူ ၃ ဦး သေဆုံးခဲ့ပြီးပြီဖြစ်လို့ နိုင်ငံတကာမှာ အရေးပေါ် ကာကွ
ယ်ရေးတွေ လုပ်နေရပါတယ်။
ရောဂါပိုး ကူးစက်ခံရရင်တော့ ဖျားတာ၊ ခေါင်းကိုက်တာနဲ့ ကြွက်သားတွေ နာကျင်တာမျိုးတွေ စဖြစ်တတ်ပါတယ်။
အမေရိကတိုက်တွေမှာဆိုရင် အဆုတ်နဲ့ နှလုံးကို ပြင်းပြင်းထန်ထန် ထိခိုက်စေပြီး သေဆုံးမှုနှုန်းက ၅၀ ရာခိုင်နှုန်းအထိ ရှိနိုင်ပါတယ်။
အာရှနဲ့ ဥရောပဘက်မှာတော့ ကျောက်ကပ်ကို အဓိက ထိခိုက်စေပြီး သွေးလွန်တုပ်ကွေးလို လက္ခဏာမျိုးတွေ ပြတတ်တယ်လို့ သိရပါတယ်။
အခုအချိန်ထိတော့ ဒီဗိုင်းရပ်စ်ကို အမြစ်ပြတ်ပျောက်ကင်းစေမယ့် သီးသန့်ကုသဆေး ဒါမှမဟုတ် ကာကွယ်ဆေးရယ်လို့ မရှိသေးပါဘူး။
ဒါကြောင့် ရောဂါလက္ခဏာ စဖြစ်ကတည်းက ဆေးရုံ၊ဆေးခန်းတွေကို စောစောစီးစီးပြသပြီး ကုသမှုခံယူဖို့က အသက်ရှင်ဖို့အတွက် အရေးကြီးဆုံးဖြစ်ပါတယ်။
စောစောသိပြီး စနစ်တကျ ကုသနိုင်ရင်တော့ အသက်အန္တရာယ်ကနေ ကာကွယ်နိုင်မှာလို့ဆိုပါတယ်။
အဲဒီကာကွယ်နိုင်တဲ့နည်းလမ်းကတော့ ကြွက်တွေနဲ့ မထိတွေ့အောင် နေထိုင်ဖို့ပဲ ဖြစ်ပါတယ်။
အိမ်နဲ့ လုပ်ငန်းခွင်တွေကို သန့်ရှင်းအောင်ထားဖို့၊ အစားအသောက်တွေကို ကြွက်မသီအောင် လုံခြုံစွာ သိမ်းဆည်းဖို့နဲ့ ကြွက်မစင်တွေကို သန့်ရှင်းရေးလုပ်ရင် ဖုန်မထအောင် ရေအရင်ဖျန်းပြီးမှ လုပ်ဖို့ WHO က တိုက်တွန်းထားပါတယ်။
