Border News Agency
အမေရိကန်၊မေ ၁၅။
အမေရိကန်သမ္မတဒေါ်နယ်လ်ထရမ့်နဲ့ တရုတ်သမ္မတ ရှီကျင့်ဖျင်တို့ဟာ ဘေဂျင်းမြို့ ပြည်သူ့ခမ်းမဆောင်ကြီးမှာတွေ့ဆုံခဲ့ကြပြီး နှစ်နိုင်ငံဆက်ဆံရေးကို တည်ငြိမ်တဲ့ဗျူဟာမြောက် မိတ်ဖက်အဖြစ် တည်ဆောက်သွားဖို့ သဘောတူညီခဲ့ကြပါတယ်။
သမ္မတရှီက ဒီဆက်ဆံရေးဟာ ကမ္ဘာ့အရေးအပါဆုံးဖြစ်ပြီး ကောင်းမွန်အောင် မကိုင်တွယ်နိုင်ရင် အလွန်အန္တရာယ်ရှိတဲ့ အခြေအနေတွေ ဖြစ်လာနိုင်တယ်လို့ သတိပေးခဲ့ပါတယ်။
အဲဒီတွေ့ဆုံမှုမှာ ခေါင်းဆောင်နှစ်ဦးဟာ အရှေ့အလယ်ပိုင်း အကျပ်အတည်းရဲ့ အဓိကသော့ချက်ဖြစ်တဲ့ ဟောမုဇ်ရေလက်ကြားကို လွတ်လပ်စွာ ဖြတ်သန်းခွင့်ပေးဖို့ ပူးတွဲသဘောတူညီခဲ့ကြပါတယ်။
ဒါ့အပြင် အီရန်အနေနဲ့ နျူကလီးယားလက်နက် လုံးဝမပိုင်ဆိုင်သင့်ဘူးဆိုတဲ့ အချက်ကိုလည်း ခေါင်းဆောင်နှစ်ဦးစလုံးက လက်ခံခဲ့ကြပါတယ်။
ကုန်သွယ်ရေးကဏ္ဍမှာတော့ ထရမ့်က တရုတ်နိုင်ငံအနေနဲ့ အမေရိကန်ရဲ့ စိုက်ပျိုးရေးထွက်ကုန်တွေနဲ့ လေယာဉ်တွေကို ပိုမိုဝယ်ယူဖို့ မျှော်လင့်နေပါတယ်။
တရုတ်ဘက်ကလည်း နည်းပညာလုပ်ငန်းသုံး မြေရှားသတ္တုတင်ပို့မှု ကန့်သတ်ချက်တွေကို ဆိုင်းငံ့ထားပြီး အမေရိကန်ဘက်ကလည်း အခွန်တိုးမယ့် အစီအစဉ်ကို ရုပ်သိမ်းထားတဲ့ အခြေအနေမှာ ရှိနေပါတယ်။
ထိုင်ဝမ်အရေးနဲ့ ပတ်သက်လို့တော့ သမ္မတရှီက ဒါဟာ နှစ်နိုင်ငံဆက်ဆံရေးမှာ အရေးအကြီးဆုံးကိစ္စဖြစ်ပြီး သေချာမကိုင်တွယ်ရင် စစ်ပွဲနဲ့ ပဋိပက္ခတွေ ဖြစ်လာနိုင်တယ်လို့ ပြင်းပြင်းထန်ထန် သတိပေးခဲ့ပါတယ်။
ဒါပေမယ့် သမ္မတထရမ့်ကတော့ ထိုင်ဝမ်အရေးနဲ့ ပတ်သက်တဲ့ သတင်းထောက်တွေရဲ့ မေးမြန်းမှုကို ဖြေကြားဖို့ ငြင်းဆိုခဲ့ပါတယ်။
သံတမန်ရေးအရ ထရမ့်က ရှီကျင့်ဖျင်ကို “သူငယ်ချင်း” လို့ ခေါ်ဆိုပြီး လေးစားမှုရှိကြောင်း ပြောကြားခဲ့သလို လာမယ့် စက်တင်ဘာလမှာ အိမ်ဖြူတော်ကို လာရောက်ဖို့လည်း ဖိတ်ကြားခဲ့ပါတယ်။
တရုတ်ဘက်ကလည်း ထရမ့်ကို လေဆိပ်မှာ ဒုသမ္မတကိုယ်တိုင် လာရောက်ကြိုဆိုစေတာမျိုးနဲ့ အမြင့်ဆုံး ဂုဏ်ပြုမှုတွေ ပြုလုပ်ခဲ့တာ တွေ့ရပါတယ်။
အဲဒီ ဒီတွေ့ဆုံပွဲဟာ ကမ္ဘာ့ထိပ်သီးနှစ်နိုင်ငံကြားက တင်းမာမှုတွေကို လျှော့ချဖို့ ကြိုးပမ်းတဲ့ သမိုင်းဝင် ခြေလှမ်းတခု ဖြစ်လာခဲ့ပါတယ်။
ခေါင်းဆောင်နှစ်ဦးဟာ လာမယ့် နိုဝင်ဘာလ ရှန်ကျန်း APEC အစည်းအဝေးနဲ့ ဒီဇင်ဘာလ မိုင်ယာမီ G20 ထိပ်သီးအစည်းအဝေးတွေမှာ ထပ်မံတွေ့ဆုံဖို့ ရှိနေပါတယ်။
