Border News Agency
အိန္ဒိယ၊မေ ၁၅။
အိန္ဒိယနိုင်ငံမြောက်ပိုင်း၊ ဥတာပရာဒေ့ရှ် ပြည်နယ်မှာဗုဒ္ဓဟူးနေ့က ပြင်းထန်တဲ့ ဖုန်မှုန်မုန်တိုင်း၊မိုးသည်းထန်စွာရွာသွန်းမှုနဲ့ မိုးကြိုးပစ်မှုတွေကြောင့် လူပေါင်း ၉၆ ဦးထက်မနည်း သေဆုံးခဲ့တယ်လို့ အိန္ဒိယသတင်းဌာနတွေမှာဖော်ပြပါတယ်။
အဲဒီ သဘာဝဘေးအန္တရာယ်ကြောင့် ခရိုင်အတော်များများမှာ လူ ၅၀ ကျော် ဒဏ်ရာရရှိခဲ့ပြီး နေအိမ်နဲ့ အဆောက်အအုံတွေလည်း ပျက်စီးခဲ့ပါတယ်။
သေဆုံးရတဲ့ အဓိကအကြောင်းရင်းတွေဟာ သစ်ပင်လဲကျတာ၊အဆောက်အအုံတွေ ပြိုကျတာနဲ့ မိုးကြိုးပစ်ခံရတာတွေကြောင့်ဖြစ်တယ်လို့ ဆိုပါတယ်။
အဲဒါကြောင့် ခုလက်ရှိလည်းကယ်ဆယ်ရေးအဖွဲ့တွေက လမ်းတွေနဲ့ ရထားလမ်းတွေပေါ်မှာ လဲကျနေတဲ့ သစ်ပင်တွေကို ဖယ်ရှားရှင်းလင်းရေးလုပ်ငန်းတွေ ဆောင်ရွက်နေကြတယ်လို့ဆိုပါတယ်။
မုန်တိုင်းကြောင့် ကျေးလက်ဒေသတွေမှာ နေအိမ်တွေ၊စိုက်ပျိုးသီးနှံတွေနဲ့ လျှပ်စစ်မဟာဓာတ်အားလိုင်းတွေ အကြီးအကျယ် ပျက်စီးခဲ့ရတယ်လို့ ဆိုပါတယ်။
အဲဒီ မုန်တိုင်းဟာ ရုတ်တရက် ရောက်ရှိလာတာဖြစ်ပြီး မိနစ်ပိုင်းအတွင်းမှာတင် ကောင်းကင်တခုလုံး မှောင်အတိကျသွားခဲ့တယ်လို့ ဒေသခံတွေကဆိုကြပါတယ်။
ဥတာပရာဒေ့ရှ် ပြည်နယ်ဝန်ကြီးချုပ် ယိုဂီ အာဒီတယာနတ်က ကယ်ဆယ်ရေးလုပ်ငန်းတွေကို ၂၄ နာရီအတွင်း အပြီးသတ်လုပ်ဆောင်ဖို့နဲ့ ထိခိုက်ခံစားရတဲ့ မိသားစုတွေကို အရေးပေါ်အကူအညီနဲ့လျော်ကြေးငွေတွေ ပေးအပ်ဖို့ အမိန့်ပေးထားပါတယ်။
အိန္ဒိယမြောက်ပိုင်းမှာ နှစ်စဉ် မုတ်သုံမိုးမရွာသွန်းမီ မတ်လကနေ ဇွန်လအတွင်း အခုလို မုန်တိုင်းတွေ တိုက်ခတ်လေ့ရှိတာဟာ ပုံမှန်ဖြစ်စဉ်တခုလည်း ဖြစ်ပါတယ်။
အဲဒါကြောင့် ခုလက်ရှိမှာတော့ အရေးပေါ်တုံ့ပြန်ရေးအဖွဲ့တွေကို ထိခိုက်မှုအများဆုံးဒေသတွေမှာ ဖြန့်ကြက်ချထားတယ်လို့ သိရပါတယ်။
