Border News Agency
ဂွ၊ ဇွန် ၁၆။
အာရက္ခတပ်တော်(AA)ထိန်းချုပ်ထားတဲ့ ဂွမြို့နယ်ကို ဇွန်လ ၁၄ ရက်နေ့က အာဏာသိမ်းစစ်တပ်လေကြောင်းတိုက်ခိုက်ခဲ့တယ်လို့ ဒေသခံတွေဆီက သိရပါတယ်။
အဲဒီ ဂွမြို့နယ်၊ကျောက်ချွန်ရွာကို ဇွန်လ ၁၄ ရက်၊ည ၁၁ နာရီ ၅၅ မိနစ်မှာ တကြိမ်၊ ည ၁၂ နာရီ ၃ မိနစ်မှာ တကြိမ်ထိ လေကြောင်းတိုက်ခိုက်ခဲ့တာ ဖြစ်ပါတယ်။
အဲဒီလို လေကြောင်းတိုက်ခိုက်ခဲ့တာကြောင့်
ကျောက်ချွန်ရွာ စာသင်ကျောင်းနဲ့ နေအိမ်တလုံး ပျက်စီးသွားသလို နွားတဲတခု ပြိုကျပြီး နွားတကောင်လည်း သေဆုံးသွားတယ်လို့သိရပါတယ်။
အဲဒီအပြင် ဇွန်လ ၈ ရက်နေ့တုန်းကလည်း အာဏာသိမ်းစစ်တပ်ရဲ့ နေဗီတစီးက ကျိန္တလီမြို့၊ တောင်ပေါ်ဒေသတွေကို လက်နက်ကြီးကျည် ၁၀ လုံးထက်မနည်းနဲ့ ပစ်ခတ်တိုက်ခိုက်ခဲ့ပါသေးတယ်။
အာဏာသိမ်းစစ်တပ်ဟာ အာရက္ခတပ်တော်ထိန်းချုပ်ထားတဲ့ မြို့တွေကို စစ်သင်္ဘောတွေက လက်နက်ကြီး၊လေယာဉ်တွေနဲ့ဆက်တိုက်ပစ်ခတ်နေလို့ ပြည်သူတွေအတွက် အန္တရာယ်အမြင့်ဆုံးဖြစ်နေတယ်လို့ အာရက္ခတပ်တော်က ဆိုပါတယ်။
လူနေထူထပ်တဲ့ အရပ်သားပြည်သူတွေနေထိုင်ရာနေရာ၊စာသင်ကျောင်း၊ဆေးရုံ၊ဆေးခန်းနဲ့ သာသနိကအဆောက်အအုံတွေကို အာဏာသိမ်းစစ်တပ်က ရည်ရွယ်ချက်ရှိရှိရေကြောင်း၊လေကြောင်းက တိုက်ခိုက်မှု ပြုလုပ်နေတယ်လို့ ဆိုပါတယ်။
အဲဒါကြောင့် ပင်လယ်ကမ်းနီးမြို့၊ ရွာတွေက မိဘပြည်သူတွေဟာ အာဏာသိမ်းစစ်တပ်ရေကြောင်း၊လေကြောင်းတိုက်ခိုက်မှုအန္တရာယ်ကို အထူးသတိထားကြပြီး စစ်ရေးသတိရှိဖို့အသိပေးထားပါတယ်။
