Border News Agency
ပန်ဆန်း၊ဇွန် ၁၉။
အာဏာသိမ်းစစ်တပ်ရဲ့ အမျိုးသားစည်းလုံးညီညွတ်ရေးနဲ့ ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ (NSPNC) ဒုတိယဗိုလ်ချုပ်ကြီး ရာပြည့်ဟာ ဇွန်လ ၁၈ ရက်နေ့က “ဝ” ဒေသကို သွားရောက်ခဲ့ပါတယ်။
အဲဒီအဖွဲ့ဟာ “ဝ” သွေးစည်းညီညွတ်ရေးတပ်မတော် (UWSA/UWSP) ရဲ့ မြို့တော်ပန်ဆန်းမှာတွေ့ခဲ့တာပါ။
အဲဒီတွေ့ဆုံပွဲမှာ ငြိမ်းချမ်းရေး၊ စည်းလုံးညီညွတ်ရေးနဲ့ ဒေသဖွံ့ဖြိုးရေးကိစ္စတွေကို အဓိကထား ဆွေးနွေးခဲ့ကြတယ်လို့ “ဝ” ဒေသသတင်း (WSTV) ရဲ့ ထုတ်ပြန်ပါတယ်။
အဲဒီ ဆွေးနွေးပွဲကို အာဏာသိမ်းစစ်တပ်ဘက်က NSPNC ကိုယ်စားလှယ်အဖွဲ့တွေ တက်ရောက်ခဲ့ပြီး UWSA ဘက်ကတော့ ဗဟိုကော်မတီ ဒုတိယဥက္ကဋ္ဌ၊အတွင်းရေးမှူးနဲ့ အဖွဲ့ဝင်တွေ တက်ရောက်ခဲ့ကြတာပါ။
ဒုတိယဗိုလ်ချုပ်ကြီး ရာပြည့် ဦးဆောင်တဲ့အဖွဲ့ဟာ “ဝ” အဖွဲ့နဲ့ မတွေ့ဆုံခင် ဇွန်လ ၁၇ ရက်နေ့ကလည်း မိုင်းလားတပ်ဖွဲ့နဲ့ သွားရောက်တွေ့ဆုံခဲ့ပါသေးတယ်။
“ဝ” နဲ့ မိုင်းလားအဖွဲ့ဟာ တိုင်းရင်းသားလက်နက်ကိုင် ၇ ဖွဲ့နဲ့ ဖွဲ့စည်းထားတဲ့ FPNCC အဖွဲ့ဝင်တွေ ဖြစ်ကြပါတယ်။
