Border News Agency
လက်ဘနွန်၊ဇွန် ၂၁။
အမေရိကန်-အီရန် ကြားဖြတ်သဘောတူညီချက်အရ ဇွန်လ ၁၉ ရက်နေ့ကအပစ်အခတ်ရပ်စဲရေး စတင်သက်ရောက်ပြီး နာရီပိုင်းအကြာ ဇွန်လ ၂၀ ရက်နေ့မှာပဲအစ္စရေးက လက်ဘနွန်တောင်ပိုင်းနဲ့ ဘီကာတောင်ကြားရှိ ဟစ်ဇဘိုလာ အခြေစိုက်စခန်းတွေကို လေကြောင်းတိုက်ခိုက်ခဲ့လို့ အရပ်သားတွေအပါအဝင် အနည်းဆုံး ၁၆ ဦး သေဆုံးသွားပါတယ်။
အစ္စရေးဘက်ကတော့ ဟစ်ဇဘိုလာအဖွဲ့က သူတို့စစ်တပ်ကို ရော့ကတ်ဒုံးကျည် အစင်း ၅၀ ကျော်နဲ့အရင်စတင်ပစ်ခတ်ခဲ့လို့ တုံ့ပြန်ရတာဖြစ်ပြီး လက်ဘနွန်မြေပေါ်မှာ စစ်တပ်ဆက်ရှိနေမှာလို့ ဆိုပါတယ်။
တဖက်မှာလည်း ဟစ်ဇဘိုလာက အစ္စရေးစစ်တပ်ကို လက်ဘနွန်အတွင်း လွတ်လပ်စွာ လှုပ်ရှားခွင့်ပေးမှာမဟုတ်ဘဲ နယ်မြေသိမ်းပိုက်ဖို့ ကြိုးပမ်းလာရင် ပြန်လည်တိုက်ခိုက်မယ်လို့ တုံ့ပြန်ထားပါတယ်။
အဲဒီအပစ်အခတ်ရပ်စဲရေးဟာ အမေရိကန်နဲ့ အီရန်တို့အကြား အမြဲတမ်းငြိမ်းချမ်းရေးစာချုပ်ချုပ်ဆိုနိုင်ဖို့ ရက်ပေါင်း ၆၀ ကြာ ဆွေးနွေးပွဲတွေစတင်ဖို့ အဓိကသော့ချက်ဖြစ်ပေမယ့် အစ္စရေးကတော့ သူတို့ဟာသဘောတူညီချက်မှာ ပါဝင်တာမရှိဘူးလို့ ငြင်းဆန်ထားတာကြောင့် ဆွေးနွေးပွဲတွေ စတင်နိုင်မယ့် အလားအလာ ဝေဝါးနေပါတယ်။
လက်ရှိမှာဆွစ်ဇာလန်နိုင်ငံက အမေရိကန်နဲ့ အီရန်ကြား ငြိမ်းချမ်းရေးဆွေးနွေးပွဲတွေ ဆက်လက်လုပ်ဆောင်နိုင်ဖို့ လျှို့ဝှက်ကူညီပေးနေပြီး ပါကစ္စတန်နဲ့ ကာတာနိုင်ငံကလည်း ကြားဝင်စေ့စပ်ပေးနေတယ်လို့ သိရပါတယ်။
ပြီးခဲ့တဲ့ ဖေဖော်ဝါရီလ ၂၈ ရက်က စတင်ခဲ့တဲ့ အမေရိကန်-အီရန် စစ်ပွဲကြောင့် လက်ရှိအချိန်အထိ အီရန်နဲ့ လက်ဘနွန်မှာ လူပေါင်း ၈,၀၀၀ ကျော် သေဆုံးခဲ့ရပြီး ကမ္ဘာ့လောင်စာဆီဈေးနှုန်းတွေ မြင့်တက်ကာ ငွေကြေးဖောင်းပွမှုဒဏ်ကို တကမ္ဘာလုံး ရင်ဆိုင်နေရပါတယ်။
