Border News Agency
စစ်ကိုင်း၊ဇွန် ၂၁။
မြန်မာ-အိန္ဒိယနှစ်နိုင်ငံ နယ်စပ်ကုန်သွယ်ရေးအတွက် အရေးပါတဲ့ စစ်ကိုင်းတိုင်း၊ကလေး-တမူး လမ်းကြောင်းပေါ်ရှိ ခါမ်းပါတ်မြို့ကို ဇွန်လ ၂၀ ရက်မှာ ပြန်လည်ထိန်းချုပ်နိုင်ခဲ့တယ်လို့ အာဏာသိမ်းစစ်တပ်က ထုတ်ပြန်ပါတယ်။
အာဏာသိမ်းစစ်တပ်ဟာ ကလေး-တမူး လမ်းကြောင်းကို ပြန်လည်ရရှိဖို့အတွက် စစ်ကြောင်းတွေခွဲကာ စစ်ဆင်ရေးတွေ လုပ်ဆောင်ခဲ့တာဖြစ်ပြီး ကလေးမြို့ဘက်မှ ချီတက်လာတဲ့ စစ်ကြောင်းတွေဟာ ဇွန်လ ၇ ရက်မှာ အရှေ့ခုံသာ၊ ၅၆ မိုင်နဲ့ ၅၅ မိုင် ကျေးရွာတို့ကို ဝင်ရောက်စီးနင်းခဲ့တယ်လို့ ဆိုပါတယ်။
အဲဒီအပြင်တမူးမြို့ဘက်မှ ချီတက်လာတဲ့ စစ်ကြောင်းတွေကလည်း နန်းမွတ်တား၊ ရန်လင်းပိုင်ကျေးရွာနဲ့ နယ်စပ်အနီးရှိ ကာကွယ်ရေးတပ်ဖွဲ့တွေရဲ့ စခန်းတွေကို ဝင်ရောက်စီးနင်းခဲ့တယ်လို့ဆိုပါတယ်။
နောက်ပြီး ဇွန်လ ၁၃ ရက်မှာ ရာဇဂြိုဟ်ရွာနဲ့ ရာဇဂြိုဟ်ရေလှောင်တမံ၊ ဇွန်လ ၁၅ ရက်မှာ ရန်မျိုးအောင်ရွာ၊ ဇွန်လ ၁၆ ရက်မှာ စော်ဘွားရေရှင်ရွာနဲ့ ဇွန်လ ၁၇ ရက်မှာ ကျွန်းတောရေရှင်ရွာတို့ကို အဆင့်ဆင့် ဝင်ရောက်စီးနင်းပြီးနောက် ခါမ်းပါတ်မြို့ကို အခုလို ပြန်လည်ထိန်းချုပ်နိုင်ခဲ့တာလို့ဆိုပါတယ်။
အဲဒီခါမ်းပါတ်မြို့ဟာ ကလေး-တမူး ကုန်သွယ်ရေးလမ်းကြောင်းပေါ်မှာ မဟာဗျူဟာကျတဲ့ မြို့တမြို့ဖြစ်ပြီး ၂၀၂၃ ခုနှစ် နိုဝင်ဘာလအတွင်းက တော်လှန်ရေးပူးပေါင်းတပ်ဖွဲ့တွေဘက်က တိုက်ခိုက်သိမ်းပိုက်ထားခဲ့တဲ့ မြို့ဖြစ်ပါတယ်။
