Border News Agency
ထိုင်း၊ ဇွန် ၂၄။
ထိုင်းနိုင်ငံ၊ Samut Prakan ပြည်နယ်၊ Phra Pradaeng ဒေသမှာရှိတဲ့ ဆောက်လုပ်ရေးလုပ်ငန်းခွင် အလုပ်သမားတန်းလျားမှာ ဇွန်လ ၂၂ ရက်၊ညပိုင်းက အိမ်ထောင်ရေးသဝန်တိုမှုကြောင့် လူသတ်မှုတခု ဖြစ်ပွားခဲ့ပါတယ်။
အသက် ၄၀ အရွယ် မြန်မာအလုပ်သမား ကိုဘိုအောင်က သူ့ရဲ့ဇနီးဖြစ်သူ အသက် ၄၀ အရွယ် မခင်အောင်ကို ဟင်းသီးဟင်းရွက်လှီးတဲ့ ဓားနဲ့ ၁၀ ချက်ကျော် ထိုးသတ်ခဲ့တာပါ။
ပြစ်မှုကျူးလွန်ပြီးတဲ့နောက် ကိုဘိုအောင်က ထွက်မပြေးဘဲ အခင်းဖြစ်တဲ့နေရာမှာပဲ ရဲတပ်ဖွဲ့လာဖမ်းတာကို စောင့်နေခဲ့ပါတယ်။
ရဲတွေရဲ့ စစ်ဆေးချက်အရ မခင်အောင်ဟာ တခြားလူတဦးနဲ့ ဖုန်းပြောနေပြီး ခင်ပွန်းဖြစ်သူနဲ့ လမ်းခွဲဖို့ ကြိုးစားနေတာကြောင့် သူတို့နှစ်ယောက် စကားများခဲ့ကြတာပါ။
ခင်ပွန်းဖြစ်သူက ကလေးရှိတဲ့အတွက် လမ်းမခွဲဖို့ တောင်းပန်ပေမယ့် ဇနီးသည်က လက်မခံဘဲ ဖုန်းလုယူရာကနေ ဒေါသထွက်ပြီး အခုလို လုပ်မိလိုက်တာလို့ သိရပါတယ်။
အခင်းဖြစ်တဲ့နေရာမှာ သွေးအိုင်ထဲ သေဆုံးနေတဲ့ မခင်အောင်ရဲ့ ရုပ်အလောင်းနဲ့ သွေးစွန်းနေတဲ့ ဓားကို ရဲတွေက သိမ်းဆည်းရမိခဲ့ပါတယ်။
လက်ရှိမှာတော့ တရားခံ ကိုဘိုအောင်ကို ရဲစခန်းမှာ ထိန်းသိမ်းထားပြီး လူသတ်မှုနဲ့ အမှုဖွင့် အရေးယူထားပါတယ်။
