Border News Agency
အမေရိကန်၊ ဇူလိုင် ၁၂ ။
အမေရိကန်နဲ့ စစ်ရေးတင်းမာမှုတွေပြင်းထန်လာပြီးနောက် ကမ္ဘာ့စွမ်းအင်တင်ပို့မှုရဲ့ အဓိကအချက်အခြာဖြစ်တဲ့ ဟောမုဇ်ရေလက်ကြားကို နောက်ထပ်ထုတ်ပြန်ချက်မရမချင်း အကန့်အသတ်မရှိပိတ်လိုက်တယ်လို့ အီရန်အစ္စလာမ်မစ်တော်လှန်ရေးအစောင့်တပ်က ဇူလိုင်လ ၁၂ ရက်၊ ဒီနေ့မနက်အစောပိုင်းမှာ ကြေညာလိုက်ပါတယ်။
အဲဒီပိတ်ဆို့မှုဟာ ဟော်မုဇ်ရေလက်ကြားမှာ ဖြတ်သန်းသွားလာနေတဲ့ အရပ်ဘက်ကုန်တင်သင်္ဘောတွေကို အီရန်ဘက်က ပစ်မှတ်ထားတိုက်ခိုက်နေတယ်ဆိုတဲ့ စွပ်စွဲချက်နဲ့ အမေရိကန်က အီရန်စစ်ရေးပစ်မှတ်တွေကို စတင်တိုက်ခိုက်ခဲ့ရာကနေ တင်းမာမှုတွေဆူပွက်လာခဲ့တာပါ။
အီရန်ဘက်ကလည်း ပင်လယ်ကွေ့ဒေသတွင်းက အမေရိကန်စစ်စခန်းတွေကို ဒုံးကျည်တွေနဲ့ ပြန်လည်လက်တုံ့ပြန်ခဲ့ပါတယ်။
ဇူလိုင်လ ၁၁ ရက်နေ့ကလည်း ဆိုက်ပရပ်စ်အလံလွှင့်ထူထားတဲ့ MV GFS Galaxy အရပ်ဘက်ကုန်တင်သင်္ဘောတစီးကို အီရန်က ခရုစ်ဒုံးကျည်နဲ့ပစ်ခတ်ခဲ့လို့ သင်္ဘောအင်ဂျင်ခန်းပျက်စီးကာ သင်္ဘောသားတဦးပျောက်ဆုံးနေကြောင်း အမေရိကန်ဗဟိုစစ်ဌာနချုပ်က ထုတ်ပြန်ပါတယ်။
အီရန်ဘက်ကတော့ အဲဒီသင်္ဘောဟာ တည်နေရာပြစနစ်ပိတ်ပြီး လမ်းကြောင်းသွေဖယ်ကာ သတိပေးပစ်ခတ်မှုကိုမျက်ကွယ်ပြုခဲ့လို့ဖြစ်ကြောင်း စွပ်စွဲထားပါတယ်။
အဲဒီသင်္ဘောတိုက်ခိုက်ခံရပြီးနောက် အမေရိကန်စစ်ဌာနချုပ်က အီရန်နိုင်ငံအတွင်းကို ခုသီတင်းပတ်အတွင်း တတိယအသုတ်အဖြစ် လေကြောင်းစစ်ဆင်ရေးတွေ ဆက်လက်ဆင်နွှဲခဲ့ပါတယ်။
အမေရိကန်ကာကွယ်ရေးဝန်ကြီး ပိထ်ဟက်ဂ်ဆက်သ်ကလည်း အီရန်ဟာ ဆိုးရွားတဲ့လုပ်ရပ်အတွက် အခုတော့ပြန်ပေးဆပ်နေရပြီလို့ လူမှုကွန်ရက်မှာ ရေးသားထားပါတယ်။
လက်ရှိမှာ အမေရိကန်သမ္မတဒေါ်နယ်လ်ထရမ့်က နှစ်နိုင်ငံကြားက အပစ်ရပ်သဘောတူညီမှုပြီးဆုံးသွားပြီလို့ ကြေညာထားပြီး တပတ်အတွင်း နှစ်ဖက်အပြန်အလှန်တိုက်ခိုက်မှုတွေကြောင့် အီရန်မှာအနည်းဆုံးဆယ့်ခုနှစ်ဦးသေဆုံးကာ တရာ့တဆယ့်ငါးဦး ဒဏ်ရာရရှိခဲ့ပါတယ်။
အဲဒီအခြေအနေကြောင့် ပါကစ္စတန်ကြားဝင်မှုနဲ့ လုပ်ဆောင်နေတဲ့ငြိမ်းချမ်းရေးဆွေးနွေးပွဲတွေ ပျက်ပြားမယ့်အရေးကို ဒေသတွင်းနိုင်ငံတွေက စိုးရိမ်နေကြတယ်လို့သိရပါတယ်။
