Border News Agency
ထိုင်း၊ဇူလိုင် ၁၂။
ထိုင်းနိုင်ငံတောင်ပိုင်း၊နခွန်စီထမ္မရတ်ခရိုင်ထဲမှာ ကားသုံးစီးနဲ့ တရားမဝင်လာတဲ့မြန်မာနိုင်ငံသားတဆယ့်ကိုးဦးနဲ့အတူသူတို့ကိုတင်လာတဲ့ထိုင်းလူမျိုး ငါးဦးကို ထိုင်းအဝေးပြေးရဲတပ်ဖွဲ့က ပိတ်ဆို့ဖမ်းဆီးလိုက်ပါတယ်။
အဲဒီ ချွန်ဖွန်ခရိုင်ကနေ ဆောင်ခလာခရိုင် ရတ်တာဖူးမ်မြို့နယ်ထဲကို တရားမဝင် အလုပ်သမားတွေ ခိုးထုတ်မယ့်သူတွေရှိတယ်လို့ ကြိုတင်သတင်းရထားတဲ့အတွက် စောင့်ဆိုင်းဖမ်းဆီးခဲ့တာ ဖြစ်ပါတယ်။
သူတို့ဟာ ရဲတွေရဲ့ စစ်ဆေးမှုကို ရှောင်ဖို့အတွက် လမ်းကြောင်းရှင်းပေးမယ့် ရှေ့ပြေးကားတစီးနဲ့ မြန်မာနိုင်ငံသားတွေတင်လာတဲ့ ကားနှစ်စီးကိုနှစ် ကီလိုမီတာလောက် ခွာပြီး မောင်းနှင်ခဲ့ကြတာပါ။
ဒါပေမယ့် ရဲတပ်ဖွဲ့က နခွန်စီထမ္မရတ်ခရိုင်၊ ချအို့မြို့နယ်ထဲက အဝေးပြေးလမ်းမကြီးအမှတ် လေးဆယ့်တပေါ်မှာ အင်အားချပြီး ကားသုံးစီးလုံးကို တပြိုင်နက် ပိတ်ဆို့ဖမ်းဆီးနိုင်ခဲ့ပါတယ်။
အဲဒီ ဖမ်းမိတဲ့ ထိုင်းနိုင်ငံသားတွေက ချွန်ဖွန်ခရိုင် ပထျူးမြို့နယ်ကနေ မြန်မာအလုပ်သမားတွေကို ခေါ်လာပြီး ဆောင်ခလာခရိုင်ကို ပို့ပေးဖို့ တခေါက်ကို ဘတ်ခုနစ်ထောင်ငါးရာ နဲ့ ငှားရမ်းခံရတာဖြစ်ပြီး အရင်ကလည်း သုံး ကြိမ်အထိ အခုလို ခိုးထုတ်ပေးဖူးတယ်လို့ ဝန်ခံထားပါတယ်။
အဲဒီဖမ်းမိတဲ့ မြန်မာ တဆယ့်ကိုး ဦး၊ ထိုင်း ငါး ဦးနဲ့အတူ သိမ်းဆည်းရမိတဲ့ ကား သုံး စီး၊ လက်ကိုင်ဖုန်းတွေကို ဥပဒေအရ ထိရောက်စွာ အရေးယူနိုင်ဖို့အတွက် ချအို့ရဲစခန်းဆီ လွှဲပြောင်းပေးထားတယ်လို့ သိရပါတယ်။
