Border News Agency
ဘယ်လာရုစ်၊ ဩဂုတ် ၂၁။
ဘယ်လာရုစ်နိုင်ငံ၊ မင့်စ်မြို့က President ဟိုတယ်မှာ သြဂုတ်လ ၂၀ ရက်နေ့က ပြုလုပ်တဲ့ မြန်မာ-ဘယ်လာရုစ် စီးပွားရေးဖိုရမ်မှာ အာဏာသိမ်းစစ်ခေါင်းဆောင်မင်းအောင်လှိုင်က ဘယ်လာရုစ်လုပ်ငန်းရှင်တွေကို မြန်မာနိုင်ငံတွင်းလာရောက် ရင်းနှီးမြှုပ်နှံကြဖို့ ဖိတ်ခေါ်ခဲ့ပါတယ်။
ဖိုရမ်မှာဘယ်လာရုစ်ရဲ့ အဓိကနည်းပညာတွေဖြစ်တဲ့ မွေးမြူရေး၊စိုက်ပျိုးရေး၊ ဓာတ်မြေဩဇာနဲ့ လယ်ယာသုံးစက်ပစ္စည်းထုတ်လုပ်ရေးကဏ္ဍတွေမှာ ပူးပေါင်းဆောင်ရွက်ဖို့ ပြောဆိုခဲ့တာပါ။
အဲဒီအပြင် လျှပ်စစ်ထုတ်လုပ်ရေး၊ ဒီဂျစ်တယ်ဝန်ဆောင်မှု၊ ဆေးဝါးနဲ့လူသုံးကုန်ထုတ်လုပ်ရေးလုပ်ငန်းတွေမှာလည်း လာရောက်ရင်းနှီးမြှုပ်နှံနိုင်တယ်လို့ ထည့်သွင်းပြောဆိုခဲ့ပါတယ်။
နောက်ပြီး ထားဝယ်အထူးစီးပွားရေးဇုန်အပါအဝင် တနင်္သာရီတိုင်းအတွင်း သတ္တုတူးဖော်ရေးနဲ့ ဟိုတယ်၊ ခရီးသွားလုပ်ငန်းတွေမှာလည်း လာရောက်လုပ်ကိုင်ကြဖို့ အာဏာသိမ်းစစ်ခေါင်းဆောင်က ဖိတ်ခေါ်ခဲ့ပါတယ်။
လက်ရှိမှာ နှစ်နိုင်ငံအကြားရင်းနှီးမြှုပ်နှံမှုမြှင့်တင်ရေးနဲ့ အပြန်အလှန်အကာအကွယ်ပေးရေးစာချုပ်ကို အမြန်ဆုံးချုပ်ဆိုနိုင်ဖို့ အာဏာသိမ်းစစ်တပ်ကပြင်ဆင်နေပါတယ်။
