Border News Agency
တာချီလိတ်၊ ဩဂုတ် ၂၄။
ရှမ်းပြည်အရှေ့ပိုင်း၊တာချီလိတ်မြို့၊ဝိန်းကျောက်ရပ်ကွက်ရှိ လိုမာဟိုတယ်အနီးမှာ အမျိုးသားတဦး သေနတ်ဒဏ်ရာနဲ့သေဆုံးနေတာကို ဩဂုတ်လ ၂၃ ရက်နေ့က တွေ့ရှိခဲ့ရတယ်လို့ ဒေသတွင်းလူမှုကူညီရေးအဖွဲ့တွေကဆိုကြပါတယ်။
အဲဒီဝိန်းကျောက်ရပ်ကွက်မှာ ည ၈ နာရီအချိန်ခန့်က လူတဦးသေဆုံးနေကြောင်း သတင်းရရှိလို့ သက်ဆိုင်ရာကသွားရောက်စစ်ဆေးခဲ့ပါတယ်။
တာချီလိတ်မြို့၊ဆန်ဆိုင်း(က)ရပ်ကွက်မှ အသက်သုံးဆယ်ခုနှစ်နှစ်အရွယ်စိုင်းလှဟာ ဝဲဘက်နားထင် ဖောက်ဝင်ဒဏ်ရာတချက်နဲ့ သေဆုံးနေတာကိုတွေ့ရှိခဲ့ရတာပါ။
အလောင်းအနီးမှာတော့ 9mm Luger ကျည်ခွံတခုနဲ့ နိုင်ငံသားစိစစ်ရေးကတ်တခုတို့ကိုပါ ထပ်မံတွေ့ရှိခဲ့ပါတယ်။
သေဆုံးသူရဲ့ ရုပ်အလောင်းကိုအဲဒီနေ့ ည ၈ နာရီခန့်မှာ လူမှုကူညီရေးအသင်းက မော်တော်ယာဉ်နဲ့ တာချီလိတ်ခရိုင် ပြည်သူ့ဆေးရုံကြီးသို့ပို့ဆောင်ပေးခဲ့ပါတယ်။
အဲဒီဖြစ်စဉ်နဲ့ပတ်သက်ပြီး စိုင်းလှသေဆုံးတဲ့အထိ သေနတ်နဲ့ပစ်ခတ်သွားသူကို သက်ဆိုင်ရာကစုံစမ်းဖော်ထုတ်နေပြီး တရားဥပဒေအရအရေးယူနိုင်ဖို့ ဆောင်ရွက်နေပါတယ်။
