Border News Agency
ကလေး၊ ဩဂုတ် ၂၄။
စစ်ကိုင်းတိုင်း၊ကလေးမြို့၊စမ်းမြို့ရပ်ကွက်ရှိ နေအိမ်တအိမ်မှာ ငွေကျပ်ဆယ့်ငါးဘီလီယံကျော်တန်ဖိုးရှိ စိတ်ကြွဆေးပြားခြောက်သန်းကျော်ကို လူနှစ်ဦးနဲ့အတူဖမ်းဆီးရမိခဲ့တယ်လို့ မူးယစ်ဆေးဝါးတားဆီးနှိမ်နင်းရေးဗဟိုကော်မတီက သြဂုတ်လ ၂၃ ရက်နေ့ထုတ်ပြန်ပါတယ်။
အဲဒီကလေးမြို့၊စမ်းမြို့ရပ်ကွက်ကို ဩဂုတ်လ ၁၅ ရက်၊ည ၇ နာရီခွဲအချိန်မှာ မျိုးမြင့်နိုင်နဲ့ ထွန်းထွန်းနိုင်တို့ နှစ်ဦးကို စိတ်ကြွဆေးပြားခြောက်ဒသမနှစ်သန်းနဲ့အတူ ဖမ်းဆီးရမိခဲ့တာပါ။
အဲဒီစိတ်ကြွဆေးပြားတွေကို စစ်ကိုင်းမှ ကလေးမြို့သို့သယ်ဆောင်ခိုင်းသူမှာ နမ့်စန်မြို့နယ်နေ ဖမ်းဆီးဖို့ကျန်နေတဲ့ ကျော်မြင့်ဖြစ်တယ်လို့ဆိုပါတယ်။
အဲဒီမူးယစ်ဆေးဝါးတွေကို ကလေးမြို့နေ လာလ်ရိုဒင်းငါ(ခ)ဒင်းသဲ၊ရန်ကုန်မြို့နေ မောင်သန်းနဲ့ တီးတိန်မြို့နေ အင်းဆွင်းပုမ်းတို့သုံးဦးကဝယ်ယူခဲ့တာပါ။
အဲဒီဖမ်းဆီးရမိသူတွေကို မူးယစ်ဆေးဝါးဥပဒေနဲ့အရေးယူထားပြီး ပါဝင်ပတ်သက်သူတွေကို ဆက်လက် စုံစမ်းနေသလို မူးယစ်ဆေးဝါးရောင်းဝယ်ရာမှရရှိတဲ့ငွေကြေးနဲ့ ပိုင်ဆိုင်မှုတွေကို ပြည်သူ့ဘဏ္ဍာအဖြစ် သိမ်းဆည်းနိုင်ဖို့ ငွေကြေးခဝါချမှုတိုက်ဖျက်ရေးဥပဒေနဲ့ပါ ဆက်လက်အရေးယူဆောင်ရွက်နေတယ်လို့ဆိုပါတယ်။
