Border News Agency
အိန္ဒိယ၊စက်တင်ဘာ ၉ ။
မြန်မာနိုင်ငံရှိတိုင်းရင်းသားလက်နက်ကိုင်တော်လှန်ရေးတပ်ဖွဲ့တွေကို ဒရုန်းနည်းပညာနဲ့စစ်ရေးလေ့ကျင့်မှုတွေသင်ကြားပေးခဲ့တယ်ဆိုပြီး ဖမ်းဆီးခံထားရတဲ့ အမေရိကန်နိုင်ငံသား Matthew Aaron VanDyke နဲ့ ယူကရိန်းနိုင်ငံသားခြောက်ဦးအပေါ် စွဲဆိုထားတဲ့ အကြမ်းဖက်မှုတိုက်ဖျက်ရေးဥပဒေပုဒ်မတွေကို အိန္ဒိယအမျိုးသားစုံစမ်းစစ်ဆေးရေး အေဂျင်စီ (NIA) က ရုပ်သိမ်းလိုက်ပြီး လူဝင်မှုကြီးကြပ်ရေးဥပဒေနဲ့ပဲ ပြောင်းလဲတရားစွဲဆိုလိုက်ပါတယ်။
စက်တင်ဘာလ ၈ ရက်နေ့က နယူးဒေလီအထူးတရားရုံးသို့ NIA တင်သွင်းခဲ့တဲ့ စွဲချက်တင်လွှာမှာ မူလစွဲဆိုထားတဲ့ အကြမ်းဖက်မှုတိုက်ဖျက်ရေးဥပဒေ (UAPA) ပုဒ်မတွေကိုဖယ်ထုတ်ခဲ့ပြီး နိုင်ငံခြားသားတွေဝင်ထွက်သွားလာမှုဆိုင်ရာ လူဝင်မှုကြီးကြပ်ရေးဥပဒေ ပုဒ်မ ၂၁ နဲ့၂၃နဲ့သာ အစားထိုးတရားစွဲဆိုခဲ့တာ ဖြစ်ပါတယ်။
စွပ်စွဲခံထားရသူတွေဟာ ၂၀၂၅ ခုနှစ်၊ဒီဇင်ဘာလအတွင်း ခရီးသွားဗီဇာနဲ့အိန္ဒိယသို့ရောက်ရှိလာပြီးနောက် မီဇိုရမ်ပြည်နယ်မှတဆင့် မြန်မာနိုင်ငံအတွင်းသို့ တရားမဝင် ဝင်ရောက်ကာတော်လှန်ရေးတပ်ဖွဲ့တွေကို ဒရုန်းစစ်ဆင်ရေး၊တပ်ဆင်ထိန်းကျောင်းမှုနဲ့ ဂျမ်မာနည်းပညာတွေသင်ကြားပေးခဲ့သလို ဥရောပမှဒရုန်း ပစ္စည်းတွေကိုလည်း အိန္ဒိယကိုဖြတ်ပြီး မြန်မာနိုင်ငံသို့ ပို့ဆောင်ပေးခဲ့တယ်လို့ စွပ်စွဲခံထားရတာဖြစ်ပါတယ်။
အဲဒီနိုင်ငံခြားသားခုနှစ်ဦးကို ပြီးခဲ့တဲ့မတ်လအတွင်း ကိုလ်ကတ္တား၊ နယူးဒေလီနဲ့ လက်ခ်နောင်းလေဆိပ်တွေမှာ အိန္ဒိယအာဏာပိုင်တွေကဖမ်းဆီးခဲ့တာဖြစ်ပြီး ကနဦးမှာ အကြမ်းဖက်မှုတိုက်ဖျက်ရေးဥပဒေနဲ့ အမှုဖွင့်ထားခဲ့တာဖြစ်ပါတယ်။
ခုစွဲချက်ပြောင်းလဲလိုက်ပေမယ့် အကြမ်းဖက်မှုဆိုင်ရာစုံစမ်းစစ်ဆေးမှုတွေအပြီးတိုင် ရပ်ဆိုင်းသွားတာမဟုတ်ဘဲ ဒရုန်းတွေနဲ့သိမ်းဆည်းရမိထားတဲ့ ဒစ်ဂျစ်တယ်ပစ္စည်းတွေကို ဆက်လက်စစ်ဆေးနေဆဲဖြစ်ကာ အချက်အလက်သစ်တွေရရင်ထပ်တိုးစွဲချက်တွေတင်သွင်းသွားမှာဖြစ်သလို လာမယ့်အောက်တိုဘာ ၁ ရက်မှာ တရားရုံးကဆက်လက်ကြားနာသွားမှာဖြစ်ပါတယ်။
