Border News Agency
မကွေး၊ အောက်တိုဘာ ၅။
မကွေးတိုင်း၊မြိုင်မြို့နယ်မှာ ပြီးခဲ့တဲ့ ၂၀၂၃ ခုနှစ်က အာဏာသိမ်းစစ်တပ် စစ်ကြောင်းနဲ့ ပျူစောထီးတွေ ဖမ်းဆီးသတ်ဖြတ်တာခံခဲ့ရတဲ့ အပြစ်မဲ့အရပ်သားတဆယ့်နှစ်ဦးရဲ့ ရုပ်အလောင်းတွေကို မြေကျင်းနှစ်ခုအတွင်း အစုလိုက်အပြုံလိုက်မြှုပ်နှံထားတဲ့နေရာကနေ ပြန်လည်တွေ့ရှိခဲ့ပါတယ်။
ပြီးခဲ့တဲ့ ၂၀၂၃ ခုနှစ်၊ဇွန်လ ၉ ရက်နေ့က စက်မှု (၂) ကနေ ဝဲတူးဘက်ကို မောင်းနှင်လာတဲ့ စစ်တပ်စစ်ကြောင်းဟာ ဂွေးကုန်းရွာ အရှေ့ဘက်ကိုရောက်ရှိချိန်မှာ ဂွေးကုန်းရွာသားကိုးဦး၊မကျီးကုန်းရွာကတဦး၊ သံချောင်းရွာကတဦးနဲ့ မကျည်းကန်ရွာကတဦး၊ စုစုပေါင်း တဆယ့်နှစ်ဦးကို မတရားဖမ်းဆီးသွားခဲ့တာဖြစ်ပါတယ်။
အဲဒီဖမ်းဆီးခံရတဲ့တဆယ့်နှစ်ဦးကို ဇွန်လ ၁၁ ရက်နေ့မှာရက်စက်စွာသတ်ဖြတ်ခဲ့ကြတာဖြစ်ပြီး အခင်းဖြစ်ပွားရာ ကန့်ဘလူမြို့နယ်၊ ဝက်ပုတ်ရွာ ပျူစောထီးစခန်းကိုသိမ်းပိုက်ပြီးနောက် ရွာထဲကနေ သိမ်းဆည်းရရှိတဲ့မှတ်စုစာအုပ်တွေအရ သတ်ဖြတ်ခံရမှုကိုအတည်ပြုနိုင်ခဲ့တာဖြစ်ပါတယ်။
အောက်တိုဘာလ ၄ ရက်နေ့ မှိုရှာသွားတဲ့ ရွာသားတဦးက အစုလိုက်အပြုံလိုက်မြှုပ်နှံထားတဲ့နေရာကိုတွေ့ရှိခဲ့တာကြောင့် ဒေသတာဝန်ရှိသူတွေဦးဆောင်ပြီး သွားရောက်တူးဖော်ရာ ကြိုးတုတ်လျက်အလောင်းတဆယ့်နှစ်လောင်းကို တွေ့ရှိခဲ့ရတာဖြစ်ပါတယ်။
အလောင်းတွေနဲ့အတူ တွေ့ရှိရတဲ့မှတ်ပုံတင်၊ ကျောင်းသားကတ်နဲ့ စာရွက်စာတမ်း အထောက်အထားတွေအရ ဖမ်းဆီးခံခဲ့ရတဲ့ ဂွေးကုန်းရွာသားတွေဖြစ်ကြောင်း အတည်ပြုနိုင်ခဲ့ပါတယ်။
ပြည်သူတွေကို ကြိုးတုတ်မျက်နှာစီးပြီး ရက်စက်စွာသတ်ဖြတ်မှုကို ဝက်ပုတ်ရွာ ပျူစောထီးခေါင်းဆောင် ဝင်းငွေနဲ့ အာဏာသိမ်းစစ်တပ်က ဗိုလ်ဘိုဖြူတို့က ဦးဆောင်ပြုလုပ်ခဲ့တာဖြစ်တယ်လို့ ဒေသခံတွေကဆိုကြပါတယ်။
