Border News Agency
ပုဏ္ဏားကျွန်း၊အောက်တိုဘာ ၅။
အာရက္ခတပ်တော်(AA)ထိန်းချုပ်ထားတဲ့ ပုဏ္ဏားကျွန်းနဲ့ကျောက်တော်ကားလမ်းတလျှောက်ရှိကျေးရွာတွေနဲ့ စစ်ဘေးရှောင်စခန်းတွေကို အာဏာသိမ်းစစ်တပ်ကလေကြောင်းပစ်မှတ်ထား ဆက်တိုက်တိုက်ခိုက်နေပါတယ်။
အဲဒီပုဏ္ဏားကျွန်းမြို့နယ်ရှိ ပန်းနီလာစစ်ဘေးရှောင်စခန်းကို အောက်တိုဘာလ ၅ ရက်၊ ဒီနေ့ မနက် ၉ နာရီကျော်အချိန်မှာ အာဏာသိမ်းစစ်တပ်လေကြောင်းတိုက်ခိုက်ခဲ့တာမို့ အမျိုးသမီးသေဆုံးသွားတယ်လို့ ပုဏ္ဏားကျွန်းဒေသခံတွေက ဆိုကြပါတယ်။
“စစ်တပ်ကစစ်ရေးပစ်မှတ်မဟုတ်တဲ့ စစ်ဘေးရှောင်စခန်းတွေကို တမင်သက်သက်ပစ်မှတ်ထားတိုက်ခိုက်နေတာပါ။မနေ့ကလည်း ပန်းနီလာစခန်းဘက်ကို ဗုံးကြဲသွားတယ်။ စစ်ဘေးရှောင်တွေကမနေရဲတော့ဘူး။ အကုန်လုံးထွက်ပြေးကုန်တာ။” ဟု ပုဏ္ဏားကျွန်း ဒေသခံတဦးက Border News Agency ကိုပြောပါတယ်။
အဲဒီပုဏ္ဏားကျွန်းမြို့နယ်ရှိ ယိုးငူ (ဗျာလ) စစ်ဘေးရှောင်စခန်းကို အောက်တိုဘာ ၄ ရက်နေ့က အာဏာသိမ်းစစ်တပ်ကတိုက်လေယာဉ်နှစ်စီးနဲ့ လေကြောင်းတိုက်ခိုက်ခဲ့တာကြောင့် စစ်ဘေးရှောင်ခြောက်ဦးသေဆုံးပြီး အများအပြားဒဏ်ရာရရှိခဲ့ပါတယ်။
အဲဒီပုဏ္ဏားကျွန်းနဲ့ ကျောက်တော်အစပ်မှာ ပြီးခဲ့တဲ့ စက်တင်ဘာလ ၄ ရက်နေ့ကတည်းက အာဏာသိမ်းစစ်တပ်နဲ့ အာရက္ခတပ်တော် (AA)ကြား စစ်ရေး တင်းမာနေပြီးတိုက်ပွဲတွေ ပြင်းထန်လာနေပါတယ်။
အာဏာသိမ်းစစ်တပ်ဟာ ပြည်သူတွေ၊စစ်ဘေးရှောင်စခန်းတွေနဲ့ သွားလာရေးလမ်းကြောင်းတွေကို ပစ်မှတ်ထားတိုက်ခိုက်နေတာလို့ အာရက္ခပြည်သူတွေက ဆိုကြပါတယ်။
“ခုပစ်ခံရတဲ့အနီးအနား ကားလမ်းမကြီးတလျှောက်လုံးက စစ်ဘေးရှောင်တွေရော၊ဒေသခံတွေပါ အဓိကအားထားသွားလာနေရတဲ့ လမ်းပိုင်းဖြစ်ပါတယ်။စစ်တပ်ကစစ်ရေးနဲ့မသက်ဆိုင်တဲ့ အရပ်သားတွေကိုပါ ခြိမ်းခြောက်တဲ့အနေနဲ့ လေကြောင်းရောလက်နက်ကြီးပါသုံးပြီး ပစ်ခတ်နေတာဖြစ်ပါတယ်။”လို့ ဒေသတွင်း စစ်ဘေးရှောင်အရေးကူညီပေးနေသူတဦးက Border News Agency ကိုပြောပါတယ်။
အဲဒီကျောက်တော်မြို့ရှိ အိန္ဒိယဈေးနဲ့ ကစ္ဆပနဒီတံတားဝန်းကျင်ကို ပြီးခဲ့တဲ့ စက်တင်ဘာလ ၂၈ ရက်နေ့ကအာဏာသိမ်းစစ်တပ် လေကြောင်းတိုက်ခိုက်ခဲ့တာကြောင့် ငါးဆယ်ဦးသေဆုံးပြီး ခြောက်ဆယ်နီးပါးဒဏ်ရာရရှိခဲ့ပါတယ်။
အဲဒီတိုက်ခိုက်မှုမှာ အမျိုးသား၊ အမျိုးသမီး၊ ကလေးသူငယ်တွေ၊ သက်ကြီးရွယ်အိုတွေနဲ့ ကိုယ်ဝန်ဆောင်မိခင်တွေအစုလိုက်အပြုံလိုက် ထိခိုက်သေဆုံးခဲ့ရတာကြောင့် စာသင်ကျောင်း၊ဆေးရုံနဲ့ ဈေးတွေကို ပစ်မှတ်ထားတိုက်ခိုက်နေတာကို လက်တုံ့ပြန်သွားမယ်လို့ ရက္ခိုင်အမျိုးသားအဖွဲ့ချုပ် (ULA) က ထုတ်ပြန်ထားပါတယ်။
အဲဒီအပြင် ပုဏ္ဏားကျွန်းမြို့နယ်၊ကျောက်ဆိပ်ကျေးရွာအနီးရှိ စစ်ဘေးရှောင်တွေနေထိုင်ရာအိုးအိမ်ကို စက်တင်ဘာ လ ၃၀ ရက်၊ည ၉ နာရီအချိန်ခန့်ကလည်း အာဏာသိမ်းစစ်တပ်တိုက်လေယာဥ်နှစ်စီးနဲ့ လေကြောင်းတိုက်ခိုက်ခဲ့ပါတယ်။
အဲဒီလိုလေကြောင်းနဲ့ လက်နက်ကြီးတိုက်ခိုက်မှုတွေကြောင့် ပုဏ္ဏားကျွန်း- ကျောက်တော်ကားလမ်းမှာ ပြည်သူတွေသွားလာရေးခက်ခဲနေပြီး ကုန်စည်စီးဆင်းမှုတွေလည်းရပ်တန့်လုနီးပါးဖြစ်ပေါ်နေပြီလို့ ဒေသခံပြည်သူတွေကဆိုကြပါတယ်။
အဲဒီအပြင် စစ်ဘေးရှောင်စခန်းတွေမှာအရေးပေါ် ဆေးဝါးနဲ့ စားနပ်ရိက္ခာအကူအညီတွေလိုအပ်နေပြီး ထပ်စစ်ဘေးရှောင်ရမယ့်အန္တရာယ်နဲ့လည်း ရင်ဆိုင်နေကြရတယ်လို့ ဆိုကြပါတယ်။
