Border News Agency
မလေးရှား၊ အောက်တိုဘာ ၇။
မလေးရှားနိုင်ငံသို့ ရောက်နေတဲ့ အာဏာသိမ်းစစ်ခေါင်းဆောင် မင်းအောင်လှိုင်ဟာ ကွာလာလမ်ပူမြို့ရှိ InterContinental ဟိုတယ်မှာပြုလုပ်တဲ့ မြန်မာ-မလေးရှား စီးပွားရေးဆိုင်ရာအဆင့်မြင့်ဆွေးနွေးပွဲသို့ တက်ရောက်ခဲ့ပါတယ်။
အဲဒီဆွေးနွေးပွဲကို ပြည်ထောင်စုသမ္မတမြန်မာနိုင်ငံကုန်သည်တွေနဲ့ စက်မှုလက်မှုလုပ်ငန်းရှင်အသင်းချုပ်(UMFCCI)၊မလေးရှားနိုင်ငံကုန်သည်တွေနဲ့ စက်မှုလက်မှုလုပ်ငန်းရှင်အသင်း (NCCIM) တို့က ဦးစီးကျင်းပတာဖြစ်ပြီး နှစ်နိုင်ငံအကြား ရင်းနှီးမြှုပ်နှံမှုနဲ့ စီးပွားရေးပူးပေါင်းဆောင်ရွက်မှုတွေ တိုးမြှင့်နိုင်ဖို့ရည်ရွယ်ကျင်းပခဲ့တာပါ။
ဆွေးနွေးပွဲအတွင်း မင်းအောင်လှိုင်က နှစ်နိုင်ငံအကြား စီးပွားရေးပူးပေါင်းဆောင်ရွက်မှု တိုးချဲ့နိုင်ရေးနဲ့ ရင်းနှီးမြှုပ်နှံမှုတွေ ပိုမိုတိုးမြှင့်နိုင်ရေးအခြေအနေတွေကို ဆွေးနွေးပြောကြားခဲ့တာဖြစ်ပါတယ်။
အဲဒီဆွေးနွေးပွဲသို့ မင်းအောင်လှိုင် အပါအဝင် အာဏာသိမ်းစစ်တပ်ရဲ့ ကိုယ်စားလှယ်အဖွဲ့ဝင်တွေ၊မလေးရှားအစိုးရ တာဝန်ရှိသူတွေ၊UMFCCI ဥက္ကဋ္ဌ ဦးအေးဝင်းနဲ့ NCCIM ဥက္ကဋ္ဌ Mr. Norsyahrin Hamidon တို့အပြင် နှစ်နိုင်ငံ စီးပွားရေးလုပ်ငန်းရှင်တွေတက်ရောက်ခဲ့ကြပါတယ်။
မလေးရှားအစိုးရဟာ နိုင်ငံအတွင်းရောက်ရှိနေတဲ့ တရားမဝင်မြန်မာလုပ်သားတွေပြန်လည်ပို့ဆောင်ရေးနဲ့ပတ်သက်လို့ အာဏာသိမ်းစစ်တပ်နဲ့တိုက်ရိုက်ဆွေးနွေး ဆောင်ရွက်နေတာဖြစ်ပါတယ်။
