Border News Agency
နေပြည်တော်၊ အောက်တိုဘာ ၃၀။
အာဏာသိမ်းစစ်တပ်ရဲ့ နိုင်ငံခြားရေးဝန်ကြီး ဦးတင်မောင်ဆွေနဲ့အာဆီယံဥက္ကဋ္ဌ မြန်မာနိုင်ငံဆိုင်ရာ အထူးကိုယ်စားလှယ် ဖိလစ်ပိုင်နိုင်ငံခြားရေးဝန်ကြီး မစ္စ မာရီယာ ထရက်ဆာ ပရဲညို လာဇာရို တို့ဟာ အောက်တိုဘာလ ၂၉ ရက်နေ့ကတွေ့ဆုံပြီး နှစ်နိုင်ငံ ပူးပေါင်းဆောင်ရွက်ရေးနဲ့ အာဆီယံကိစ္စတွေကို ဆွေးနွေးခဲ့ကြပါတယ်။
အဲဒီတွေ့ဆုံပွဲမှာ နှစ်နိုင်ငံသံတမန်ဆက်ဆံရေး နှစ် ၇၀ ပြည့် အထိမ်းအမှတ်ပူးပေါင်းဆောင်ရွက်မှု တိုးမြှင့်ရေး မကြာမီကျင်းပမယ့် အာဆီယံထိပ်သီးအစည်းအဝေးဆိုင်ရာ ကိစ္စတွေနဲ့လူသားချင်းစာနာမှု အကူအညီပေးအပ်ရေးကိစ္စတွေကို ထည့်သွင်းဆွေးနွေးခဲ့ကြတာဖြစ်ပါတယ်။
တွေ့ဆုံပွဲမှာ အာဏာသိမ်းစစ်တပ်က တိုင်းပြည်တည်ငြိမ်အေးချမ်းရေးနဲ့ ငြိမ်းချမ်းရေး ဆောင်ရွက်နေကြောင်း အပြုသဘော ပြောဆိုခဲ့သော်လည်း အာဆီယံအထူးကိုယ်စားလှယ်က ခရီးစဉ်အတွင်း လေ့လာတွေ့ရှိချက်တွေကို လာမယ့်အာဆီယံထိပ်သီးအစည်းအဝေးသို့ တင်ပြသွားမယ်လို့ဆိုပါတယ်။
အာဏာသိမ်းစစ်တပ်ရဲ့လေကြောင်း တိုက်ခိုက်မှုတွေနဲ့ စစ်ကြောင်းထိုးမှုတွေကြောင့် ပြည်သူများစွာ စစ်ဘေးဒုက္ခ ကြုံတွေ့နေရဆဲ ဖြစ်ပြီး တည်ငြိမ်အေးချမ်းရေး ပြောဆိုချက်တွေမှာ မြေပြင်ပကတိအခြေအနေနဲ့ လွဲမှားနေတယ်လို့ ပြည်သူတွေကဆိုကြပါတယ်။
အဲဒီအပြင် အာဏာသိမ်းစစ်တပ်ဟာ နိုင်ငံတကာ သံတမန်ရေးအရ ထိတွေ့ဆက်ဆံမှုပုံဖော်နေပေမယ့် အာဆီယံရဲ့ ဘုံသဘောတူညီချက် ၅ ချက်ကို လိုက်နာတာ မရှိသေးသလို မြေပြင်မှာလည်းတိုက်ပွဲတွေ ဆက်လက် ပြင်းထန်နေဆဲဖြစ်ပါတယ်။
