Border News Agency
ကျောက်ဖြူ၊ ဩဂုတ် ၂၂။
အာရက္ခဒေသမှာကုန်ဈေးနှုန်းကြီးမြင့်မှုနဲ့ စားဝတ်နေရေးအကျပ်အတည်းတွေကြောင့် မိဘတွေဟာပညာသင်စရိတ်မတတ်နိုင်ကြတာမို့ ကလေးငယ်တွေကျောင်းထွက်လိုက်ကြရတယ်လို့ ကျောင်းသားမိဘတွေကဆိုကြပါတယ်။
အဲဒီကျောင်းနေအရွယ်ကလေးသူငယ်တွေဟာ ကျောင်းလခတွေအဆမတန်မြင့်တက်လာတာအပြင် စာအုပ်၊ခဲတံအပါအဝင် ကျောင်းသုံးသင်ထောက်ကူပစ္စည်းစရိတ်တွေ မဝယ်ယူနိုင်တော့တာကြောင့် ကျောင်းထွက်လိုက်ကြရတာလို့ ကျောင်းသားမိဘတွေကဆိုကြပါတယ်။
”အရင်ကစာသင်စရိတ်ငါးထောင်ပါ။ ခုတသောင်းငါးထောင်ဖြစ်သွားပါတယ်။ မိဘဆင်းရဲတဲ့ကလေးတွေငယ်ငယ်ရွယ်ရွယ်နဲ့ ကျောင်းထွက်ရပါတယ်။ အဲဒီလိုဖြစ်နေပါတယ်။ ကျမမှာခုကလေးတယောက် ငါးတန်းပါ။ တသောင်းခွဲပေးရပါတယ်။ ကျမတို့ဘက်က အရမ်းခက်ခဲနေတာပါ။ ဟိုမသွားရ ဒီမသွားရပါဘူး။ပိုက်ဆံ ဘယ်ကရမလဲ။ ကျမလည်းမထားနိုင်တော့ပါဘူး။” လို့ ကျောက်ဖြူမြို့နယ်မှ ကျောင်းသားမိဘအမျိုးသမီးတဦးဖြစ်သူ မဖြူမေက Border News Agency ကိုပြောပါတယ်။
အာရက္ခပြည်သူ့တော်လှန်ရေးအစိုးရက အထက်တန်းအဆင့်ကကျပ်သုံးသောင်း၊ အလယ်တန်းအဆင့်ကို ကျပ်နှစ်သောင်း၊ မူလတန်းအဆင့်ကို ကျပ်တသောင်းကျပ်သာ ကျောင်းလခအဖြစ်သတ်မှတ်ထားပါတယ်။
အဲဒီအပြင်ကျောင်းသုံးစရိတ်နဲ့ ပရိဘောဂလိုအပ်ချက်တွေအတွက် အပိုကောက်ခံတာတွေဟာ ရွာရဲ့စေတနာအလိုက် ကိုယ့်ကျောင်းလည်ပတ်နိုင်ဖို့ ပူးပေါင်းဆောင်ရွက်တာသာဖြစ်ပြီး အာရက္ခအစိုးရရဲ့ သတ်မှတ်ချက်မဟုတ်ဘူးလို့ အာရက္ခအမျိုးသားပညာရေးအသိုင်းအဝိုင်းကဆိုကြပါတယ်။
စစ်ရေးပဋိပက္ခတွေကြောင့် အလုပ်အကိုင်ရှားပါးနေချိန်မှာ ကျောင်းလခနဲ့ပညာသင်ကုန်ကျစရိတ်တွေ ပိုမြင့်တက်လာတာကြောင့် မူလတန်းမှအထက်တန်းထိ ကလေးငယ်တွေ ကျောင်းထွက်နေကြရတယ်လို့ ကျောင်းသားမိဘတွေကဆိုကြပါတယ်။
”ကျောင်းလခတင် မဟုတ်ပါဘူး။ စာအုပ်၊ ခဲတံကအစဈေးတွေ အဆမတန်တက်သွားတာကြောင့် မိသားစုစားဝတ်နေရေးနဲ့တင်မနိုင်မနင်းဖြစ်နေရတာပါ။ ပို က်ဆံရှိတဲ့မိသားစုတွေပဲကျောင်းထားနိုင်ပြီး အခြေခံလူတန်းစားကလေးတွေကတော့ ကျောင်းထွက်လိုက်ရပါတယ်။ “လို့ မြောက်ဦးမြို့နယ်မှ ကျောင်းသားမိဘအမျိုးသမီးတဦးက Border News Agency ကိုပြောပါတယ်။
အာရက္ခပြည်သူ့တော်လှန်ရေးအစိုးရက ပညာသင်ထောက်ပံ့ရေးအစီအစဉ်တွေပြုလုပ်ပေးသွားမယ်လို့ ပြီးခဲ့တဲ့ဇွန်လက ထုတ်ပြန်ခဲ့ပြီးအဲဒီအကူအညီတွေကျယ်ကျယ်ပြန့်ပြန့် ရောက်လာဖို့ဒေသခံက မျှော်လင့်နေကြပါတယ်။
”အစိုးရဘက်ကထောက်ပံ့ပေးမယ်လို့ ကြားရတော့မျှော်လင့်ချက်ရှိခဲ့ပါတယ်။ အခုချိန်မှာ စားဝတ်နေရေးလည်း အရမ်းကျပ်တည်းနေတော့ မိသားစုအဆင်မပြေလို့ ကလေးတွေကိုကျောင်းမလွှတ်နိုင်ဘဲကျောင်းထွက်လိုက်ရတဲ့ အခြေအနေတွေဖြစ်နေလို့အကူအညီတွေ မြန်မြန်ရောက်လာစေချင်ပါတယ်။”လို့ ပုဏ္ဏားကျွန်းမြို့နယ်မှ ကျောင်းသားမိဘအမျိုးသမီးတဦးက Border News Agency ကို ပြောပါတယ်။
အာရက္ခအမျိုးသားပညာရေးစနစ်သစ်ကို အကောင်အထည်ဖော်ဆောင်ရွက်နေပေမယ့် ကုန်ဈေးနှုန်းကြီးမြှင့်မှုနဲ့မိသားစုဝင်ငွေနည်းပါးမှုတွေကြောင့် ဆင်းရဲနွမ်းပါးတဲ့မိသားစုတွေမှာ ကလေးတွေရဲ့ပညာရေးအတွက် ဆက်ရုန်းကန်နေကြရတယ်လို့ ဆိုကြပါတယ်။
အဲဒါကြောင့် အာရက္ခပြည်သူ့တော်လှန်ရေးအစိုးရဟာ ပညာသင်စရိတ်အခက်အခဲကြောင့် ကလေးသူငယ်တွေကျောင်းမထွက်ကြရစေဖို့အတွက် လိုအပ်နေတဲ့ ပညာသင်ထောက်ပံ့ရေးအစီအစဉ်တွေနဲ့ သင်ထောက်ကူပစ္စည်းကူညီထောက်ပံ့မှုတွေကို လက်တွေ့အကောင်အထည်ဖော်ဆောင်ရွက်ပေးဖို့ ပြည်သူတွေက တောင်းဆိုနေကြပါတယ်။
