Border News Agency
မဲဆောက်၊ ဇန်နဝါရီ ၂၈။
ထိုင်းနိုင်ငံရှိသစ်သီးစားလင်းဆွဲအချို့မှာ သေဆုံးနှုန်းခုနှစ်ဆယ့်ငါးရာခိုင်နှုန်းအထိရှိနိုင်တဲ့ နီပါး (Nipah) ဗိုင်းရပ်စ်ပိုး စစ်ဆေးတွေ့ရှိတယ်လို့ ထိုင်းကျန်းမာရေးဝန်ကြီးဌာနက ဇန်နဝါရီလ ၂၆ ရက်နေ့မှာ သတိပေးထုတ်ပြန်လိုက်ပါတယ်။
အဲဒါကြောင့် နိုင်ငံတကာလေဆိပ်တွေမှာ ရောဂါစောင့်ကြည့်ရေးလုပ်ငန်းတွေကို အရင်ကထက် ပိုမိုအရှိန်မြှင့် ဆောင်ရွက်နေတယ်လို့ သိရပါတယ်။
ထိုင်းကျန်းမာရေးဒုတိယအတွင်းဝန် ဒေါက်တာ Sophon Iamsirithaworn ရဲ့ ပြောကြားချက်အရ အခုတွေ့ရှိတဲ့ပိုးဟာ”ဘင်္ဂလားဒေ့ရှ်မျိုးကွဲ”ဖြစ်ပြီး အဆုတ်နဲ့ ဦးနှောက်ရောင်ရမ်းမှုကို ပြင်းပြင်းထန်ထန် ဖြစ်စေနိုင်ပါတယ်။
အဲဒါကြောင့် လက်ရှိ ထိုင်းနိုင်ငံတွင်းရှိ လင်းဆွဲတွေမှာတွေ့ရတဲ့ပိုးဟာ အိန္ဒိယနဲ့ ဘင်္ဂလားဒေ့ရှ်မှာတွေ့ရတဲ့ ပမာဏထက် လေးဆယ်မှငါးဆယ်ရာခိုင်နှုန်းလောက်အထိ အဖြစ်နည်းနေသေးပေမယ့် အထူးသတိထားဖို့ လိုအပ်နေတာပါ။
အိမ်နီးချင်းနိုင်ငံတွေကနေ ရောဂါပိုးဝင်ရောက်လာမှာကို ကာကွယ်ဖို့အတွက် သုဝဏ္ဏဘူမိ၊ ဒွန်မောင်းနဲ့ ဖူးခက်လေဆိပ်တွေမှာ အိန္ဒိယနဲ့ ဘင်္ဂလားဒေ့ရှ်က လာတဲ့ခရီးသည်တွေကို အထူးကြပ်မတ်စစ်ဆေးနေပါတယ်။
အဲဒါကြောင့် ရောဂါလက္ခဏာ သံသယရှိသူတွေ့ရင် ချက်ချင်းခွဲခြားပြီး ဆေးစစ်မှုတွေလုပ်ဖို့ ကျန်းမာရေးဝန်ထမ်းတွေကို ညွှန်ကြားထားပြီးသားဖြစ်ပါတယ်။
အဲဒီနီပါးဗိုင်းရပ်စ်ဟာ ရောဂါပိုးရှိတဲ့တိရစ္ဆာန် ဒါမှမဟုတ် လူနာနဲ့တိုက်ရိုက်ထိတွေ့မှသာ ကူးစက်နိုင်တာကြောင့် ကိုဗစ်လိုမျိုး ကူးစက်နှုန်းမမြန်ပါဘူး။
ဒါပေမယ့် ဒီဗိုင်းရပ်စ်အတွက် ထိရောက်တဲ့ကုသဆေးနဲ့ ကာကွယ်ဆေးခုထက်ထိ မရှိသေးတာကြောင့် အသက်အန္တရာယ်အတွက် အထူးစိုးရိမ်ရတာ ဖြစ်ပါတယ်။
အဲဒါကြောင့် ပြည်သူတွေအနေနဲ့ လင်းဆွဲတွေကျက်စားတဲ့နေရာတွေနဲ့ ဝေးဝေးနေဖို့၊ လင်းဆွဲကိုက်ထားတဲ့ သစ်သီးတွေကို မစားဖို့နဲ့ လင်းဆွဲတွေရှိတဲ့နေရာနဲ့ အနီးတဝိုက်မှာဝက်မွေးမြူရေးခြံတွေ မဆောက်ကြဖို့ ကျန်းမာရေးဌာနက တိုက်တွန်းထားပါတယ်။
အဲဒီရောဂါကူးစက်ခံရရင် ဦးနှောက်ရောင်တာနဲ့ ဝက်ရူးပြန်သလိုမျိုး တက်တာတွေဖြစ်နိုင်လို့ ကလေးငယ်တွေကို အထူးဂရုစိုက်ဖို့ လိုပါတယ်။
အဲဒီထိုင်းနိုင်ငံအတွင်း လင်းဆွဲကနေ လူကိုကူးစက်တဲ့ဖြစ်စဉ် (Local Transmission)တော့ မတွေ့ရသေးပေမယ့် အခုလိုခရီးသွားလာသူတွေများတဲ့ ပွင့်လင်းရာသီမှာ ရောဂါပိုးတွေကူးစက်မလာအောင် ကျန်းမာရေးသတိနဲ့နေထိုင်ကြဖို့ ဒေါက်တာSophon က သတိပေးထားပါတယ်။
အဲဒီအပြင် တဖက်မှာလည်း အိန္ဒိယနိုင်ငံမှာ နီပါးဗိုင်းရပ်စ်ပိုးတွေ့ရှိသူနှစ်ဦးရှိခဲ့ပေမယ့် သူတို့နဲ့ထိတွေ့ခဲ့သူပေါင်း တရာ့ကိုးဆယ်ကျော်ကို စစ်ဆေးရာမှာတော့ ရောဂါပိုးမတွေ့ရှိ (Negative) ကြောင်း သိရပါတယ်။
