Border News Agency
အိန္ဒိယ၊ မတ်လ ၁၉။
အိန္ဒိယနိုင်ငံအပေါ် အကြမ်းဖက်တိုက်ခိုက်မှုတွေလုပ်ဆောင်ဖို့ ပူးပေါင်းကြံစည်တယ်ဆိုတဲ့ စွပ်စွဲချက်နဲ့ယူကရိန်းနိုင်ငံသား ၆ ဦးနဲ့အမေရိကန်နိုင်ငံသား ၁ ဦးတို့ကို အိန္ဒိယအမျိုးသားစုံစမ်းစစ်ဆေးရေးအေဂျင်စီ (NIA) က ဖမ်းဆီးထိန်းသိမ်းလိုက်ပါတယ်။
အဲဒီ ဖမ်းဆီးခံရသူတွေကို ဒေလီ၊ ကာလ်ကတ္တားနဲ့လက်ခနောင်းမြို့တွေက လေဆိပ်တွေမှာ ဖမ်းမိခဲ့တာဖြစ်ပြီး သူတို့ဟာ အိန္ဒိယကိုတရားဝင်ဗီဇာနဲ့ ဝင်ရောက်လာသူတွေဖြစ်တယ်လို့ သိရပါတယ်။
ဒါပေမဲ့ တားမြစ်နယ်မြေဖြစ်တဲ့ မီဇိုရမ်ပြည်နယ်ထဲကို ခွင့်ပြုချက်မရှိဘဲသွားရောက်ခဲ့ကြတာပါ။
စုံစမ်းစစ်ဆေးချက်တွေအရ အဲဒီနိုင်ငံခြားသားတွေဟာ မီဇိုရမ်ကတဆင့် မြန်မာနိုင်ငံဘက်ကို ဖြတ်ကျော်ဝင်ရောက်ခဲ့ပြီး အိန္ဒိယကိုဆန့်ကျင်နေတဲ့ လက်နက်ကိုင်အဖွဲ့တွေနဲ့ ဆက်သွယ်ခဲ့ကြတယ်လို့ ဆိုပါတယ်။
ဒါ့အပြင် ဥရောပကနေ ဒရုန်းတွေကို တင်သွင်းပြီး အဲဒီလက်နက်ကိုင်အဖွဲ့တွေဆီ ပို့ဆောင်ပေးခဲ့တယ်လို့လည်း သိရပါတယ်။
လက်ရှိမှာတော့ ဒေလီတရားရုံးက ဖမ်းဆီးခံရသူတွေကို မတ်လ ၂၇ ရက်နေ့အထိ ချုပ်ရက်ရယူထားပြီး လိုအပ်တဲ့ စုံစမ်းစစ်ဆေးမှုတွေ ဆက်လက်လုပ်ဆောင်နေတယ်လို့ သိရပါတယ်။
