Border News Agency
မြောက်ဦး၊ ဧပြီ ၁၄။
မြောက်ဦးမြို့၊ ကုန်သည်တန်းရပ်ကွက်က အလှကုန်ဆိုင်တဆိုင်ကိုဖောက်ထွင်းပြီး ကျပ်သိန်း ၃၀၀ ကျော်ဖိုး ပစ္စည်းတွေခိုးသွားတဲ့သူ ၂ ဦးကို ခိုးရာပါပစ္စည်းတွေနဲ့အတူဖမ်းမိခဲ့တယ်လို့ အာရက္ခတပ်တော်ရဲ့တရားဥပဒေစိုးမိုးရေးနဲ့ ပြည်သူ့လုံခြုံရေးအဖွဲ့က ဧပြီလ ၁၄ ရက်၊ ဒီနေ့ထုတ်ပြန်ပါတယ်။
အဲဒီဖမ်းမိတဲ့သူတွေဟာ စစ်တွေမြို့ရှိမောင်ဆန်းမြင့်နဲ့ သံတွဲရှိမငြိမ်းငြိမ်းဦးတို့ ဖြစ်ပါတယ်။
သူတို့ဟာ ပြီးခဲ့တဲ့ ဖေဖော်ဝါရီလ၂၇ ရက်နေ့ ညဉ့်ဦးပိုင်းမှာ ဆိုင်တံခါးသော့တွေကိုသံဖြတ်ကတ်ကြေးနဲ့ဖြတ်ပြီး အလှကုန်မျိုးစုံကို ဖောက်ထွင်းခိုးယူခဲ့တာပါ။
ဒီလပ်က မြေပြင်စုံစမ်းနေတုန်း မြောက်ဦးဈေးထဲမှာ မငြိမ်းငြိမ်းဦးက အလှကုန်တွေကို ဈေးလျှော့ရောင်းနေတာကို မသင်္ကာလို့ ဖမ်းဆီးစစ်ဆေးရာကနေ ပေါ်ပေါက်ခဲ့တာလို့ဆိုပါတယ်။
သူတို့ ၂ ဦးဟာ မြောက်ဦးမြို့ပေါ်က ဖုန်းဆိုင်နဲ့ကွန်ပျူတာဆိုင်တွေကိုဖောက်ထွင်းခဲ့တဲ့ အမှုဟောင်းတွေလည်းရှိနေတာကြောင့် အမှုတွေအများကြီးနဲ့ ရင်ဆိုင်ရဖို့ရှိနေပါတယ်။
အဲဒီဖမ်းဆီးရမိသူတွေကို လက်ရှိမှာတော့ ဒီလပ်လုပ်ထုံးလုပ်နည်းအတိုင်းအမှုဖွင့်ထားပြီး တရားစွဲဆိုဖို့ပြင်ဆင်နေပါတယ်။
