Border News Agency
အမေရိကန်၊ ဧပြီ ၂၂။
ကမ္ဘာ့ရေနံနဲ့ ကုန်စည်တွေ သယ်ယူပို့ဆောင်ရာမှာ အဓိကကျတဲ့ ဟော်မုဇ်ရေလက်ကြားပိတ်ဆို့ထားတဲ့သူတွေကို ဒဏ်ခတ်ပိတ်ဆို့မှုအသစ်တွေ ထပ်တိုးဖို့ ဥရောပသမဂ္ဂ (EU) ဘက်က ဆုံးဖြတ်လိုက်တယ်လို့ သိရပါတယ်။
အမေရိကန်-အစ္စရေးနဲ့ အီရန်တို့ စစ်ပွဲစတင်ခဲ့တဲ့ ဖေဖော်ဝါရီလနှောင်းပိုင်းကတည်းက အီရန်ဘက်က ဒီရေလက်ကြားကို ပိတ်လိုက်တာကြောင့် ကမ္ဘာ့ရေနံနဲ့ သဘာဝဓာတ်ငွေ့ ငါးပုံတပုံလောက် စီးဆင်းမှု ပြတ်တောက်နေတာ နှစ်လနီးပါး ရှိလာပါပြီ။
ပြီးခဲ့တဲ့ရက်ပိုင်းက ရေလက်ကြားကို ခဏပြန်ဖွင့်ပေးခဲ့လို့ ကုန်တင်သင်္ဘောတချို့ ဖြတ်သန်းနိုင်ခဲ့ပေမယ့် အမေရိကန်ဘက်က အီရန်ကုန်တင်သင်္ဘောတစီးကို ဖမ်းဆီးလိုက်တာကြောင့် အပစ်ရပ်ရေးသဘောတူညီချက်ဟာ ပျက်ပြားမယ့်အခြေအနေနဲ့ ပြန်ရင်ဆိုင်နေရတာပါ။
လက်ရှိမှာတော့ EU အနေနဲ့ ရေကြောင်းသွားလာခွင့်ကို ပိတ်ဆို့နေတဲ့ ပုဂ္ဂိုလ်တွေနဲ့ အဖွဲ့အစည်းတွေကို စာရင်းပြုစုနေပြီး နောက်သီတင်းပတ်အနည်းငယ်အတွင်းမှာ ဒဏ်ခတ်ပိတ်ဆို့မှုအသစ်တွေကို ထုတ်ပြန်သွားဖို့ ရှိနေပါတယ်။
