Border News Agency
ဝါရှင်တန်ဒီစီ၊ ဧပြီ ၂၆။
ဝါရှင်တန်ဒီစီက ဟိုတယ်တခုမှာ ကျင်းပနေတဲ့ အိမ်ဖြူတော် သတင်းထောက်များအသင်း ညစာစားပွဲအပြင်ဘက်မှာ ဧပြီလ ၂၅ ရက်နေ့က သေနတ်ပစ်ခတ်မှုဖြစ်ပွားခဲ့ပြီး သမ္မတ ဒေါ်နယ်ထရမ့်နဲ့ အစိုးရအဖွဲ့ဝင်တွေကို လုံခြုံရေးအဖွဲ့က အရေးပေါ် ခေါ်ထုတ်သွားခဲ့ရပါတယ်။
သမ္မတ ထရမ့်ဟာ ထိခိုက်ဒဏ်ရာရရှိမှုမရှိဘဲ ဘေးကင်းစွာရှိနေသလို ပစ်ခတ်ခဲ့တဲ့ သေနတ်သမားကိုလည်း လုံခြုံရေးတပ်ဖွဲ့ဝင်တွေက ဖမ်းဆီးထိန်းသိမ်းနိုင်ခဲ့ပြီလို့ သိရပါတယ်။
အဲဒီဖမ်းဆီးရမိသူဟာ ကာလီဖိုးနီးယားပြည်နယ်မှာ နေထိုင်သူဖြစ်ပြီး တကိုယ်တော် ကျူးလွန်ခဲ့တာလို့ FBI က ယူဆထားပါတယ်။
အဲဒီအမျိုးသားကို တရားမဝင် လက်နက်ကိုင်ဆောင်မှုအပါအဝင် ပုဒ်မများစွာနဲ့ အမှုဖွင့် အရေးယူသွားမှာ ဖြစ်ပါတယ်။
ဒီပစ်ခတ်မှုအတွင်း လုံခြုံရေးအရာရှိတဦး သေနတ်ကျည်ဆန် ထိမှန်ခဲ့ပေမယ့် ကျည်ကာအင်္ကျီ ဝတ်ဆင်ထားတာကြောင့် ဒဏ်ရာအပြင်းအထန်မရဘဲ ကျန်းမာရေး အခြေအနေ ကောင်းမွန်တယ်လို့ သမ္မတက ပြောဆိုထားပါတယ်။
သမ္မတ ထရမ့်ကတော့ အခုဖြစ်စဉ်ဟာ လက်ရှိဖြစ်ပွားနေတဲ့ အီရန်နဲ့ စစ်ပွဲနဲ့ ဆက်စပ်မှုမရှိဘူးလို့ ယူဆကြောင်းနဲ့ အမေရိကန်နိုင်ငံသားတွေအနေနဲ့ သဘောထားကွဲလွဲမှုတွေကို ငြိမ်းချမ်းစွာ ဖြေရှင်းကြဖို့ တိုက်တွန်းပြောကြားခဲ့ပါတယ်။
