Border News Agency
ယူကရိန်း၊ ဧပြီ ၃၀။
ယူကရိန်းနိုင်ငံတဝှမ်းကို ရုရှားကဒရုန်း၊ လက်နက်ကြီးတွေနဲ့အပြင်းအထန် တိုက်ခိုက်ခဲ့တာကြောင့် လူ ၃ ဦး သေဆုံးပြီး ၁၇ ဦး ဒဏ်ရာရရှိခဲ့တယ်လို့ ဒေသန္တရအစိုးရက ဧပြီလ ၂၉ ရက်နေ့မှာ ပြောပါတယ်။
ဒီတိုက်ခိုက်မှုတွေဟာ စစ်ပွဲရပ်တန့်ရေး ငြိမ်းချမ်းရေးဆွေးနွေးပွဲတွေ ရပ်တန့်နေချိန်မှာ ဖြစ်ပွားခဲ့တာပါ။
အဲဒီဒိုးနက်စ်ဒေသမှာ ရုရှားရဲ့ တိုက်ခိုက်မှုပေါင်း ၁၉ ကြိမ်ရှိခဲ့ပြီး လူ ၂ ဦး သေဆုံးခဲ့ပါတယ်။
တိုက်ပွဲပြင်းထန်နေတာကြောင့် ကလေးသူငယ် ၃၄ ဦးအပါအဝင် စုစုပေါင်း လူဦးရေ ၈၀၀ ကျော်ကို ရှေ့တန်းဒေသတွေကနေ ဘေးလွတ်ရာကို ရွှေ့ပြောင်းပေးခဲ့ရတယ်လို့ သိရပါတယ်။
အဲဒီအပြင်ဆူမီ ဒေသမှာလည်း ရုရှားရဲ့ ဒရုန်းတိုက်ခိုက်မှုကြောင့် လူနေအိမ်တွေ မီးလောင်ခဲ့ပြီး အသက် ၆၀ အရွယ် အမျိုးသမီးတဦး သေဆုံးခဲ့ပါတယ်။
ရုရှားတပ်ဖွဲ့တွေဟာ လူနေအိမ်တွေကို တိုက်ရိုက်ပစ်မှတ်ထား တိုက်ခိုက်နေတာဖြစ်တယ်လို့ ဒေသတွင်း တာဝန်ရှိသူတွေက ဆိုပါတယ်။
အိုဒက်ဆာမြို့မှာတော့ ရုရှားရဲ့ တိုက်ခိုက်မှုကြောင့် ဆေးရုံတရုံနဲ့ လူနေအိမ်တွေ ထိခိုက်ပျက်စီးခဲ့ပါတယ်။
အဲဒီဆေးရုံအတွင်းက နှလုံးနဲ့ ခွဲစိတ်ကုသဆောင်တွေ ပျက်စီးသွားခဲ့ပြီး တိုက်ခိုက်မှုဖြစ်စဉ်အတွင်း လူနာတွေဟာ မြေအောက်ခန်းတွေထဲမှာ ပုန်းရှောင်ခဲ့ကြရပါတယ်။
တဖက်မှာလည်း ယူကရိန်းဘက်က ရုရှားနိုင်ငံအရှေ့ပိုင်း ပါမ်ဒေသက စက်မှုလုပ်ငန်းတခုကို ဒရုန်းနဲ့ ပြန်လည်တိုက်ခိုက်ခဲ့ပါတယ်။
ပြီးခဲ့တဲ့ ၂၀၂၂ ခုနှစ်က စတင်ခဲ့တဲ့ ဒီစစ်ပွဲဟာ လေးနှစ်ထဲကို ရောက်ရှိလာပြီဖြစ်ပြီး ငြိမ်းချမ်းရေးဆွေးနွေးမှုတွေကတော့ လက်ရှိမှာ တန့်နေဆဲဖြစ်ပါတယ်။
