Border News Agency
မောင်တော၊ မေ ၂။
အာရက္ခ-ဘင်္ဂလားဒေ့ရှ် နယ်စပ်ကုန်သွယ်ရေးဟာ မေလ ၁ ရက်၊ မနေ့က စတင်နေပြီလို့ ဘင်္ဂလားဒေ့ရှ်နိုင်ငံ၊ တက္ကနာဖ်ရှိကုန်သည်တွေက အတည်ပြုပြောကြပါတယ်။
အဲဒီနှစ်နိုင်ငံနယ်စပ်ကုန်သွယ်ရေးဟာအာရက္ခတပ်တော်(AA)ထိန်းချုပ်ထားတဲ့ မောင်တောမြို့နယ်၊ ကညင်ချောင်းစီးပွားရေးဇုန်ဆိပ်ကမ်းမှဘင်္ဂလားဒေ့ရှ်နိုင်ငံ၊ တက္ကနာဖ်ဆိပ်ကမ်းသို့ တိုက်ရိုက်ကုန်သွယ်နေတာပါ။
အာရက္ခပြည်သူ့တော်လှန်ရေးအစိုးရနဲ့ ဘင်္ဂလားဒေ့ရှ်နိုင်ငံအစိုးရသစ်ကြား နှစ်နိုင်ငံနယ်စပ်ကုန်သွယ်ရေးမှာ အာရက္ခဒေသမှ ကျွန်းသစ်တွေစတင်တင်ပို့နေတာလို့ ကုန်သည်တွေက ဆိုကြပါတယ် ။
“မောင်တောကညင်ချောင်းဆိပ်ကမ်းက သစ်ဘုတ်တစီးတက္ကနာဖ်ဆိပ်ကမ်းကိုရောက်ပါတယ်။ ရပ်တန့်နေတဲ့နယ်စပ်ကုန်သွယ်ရေးဟာအစိုးရသစ်လက်ထက်မှာပြန်စတာပါ။ ကုန်သည်တွေက တော့ကုန်သွယ်ရေးပြန်စချင်နေကြတာကြပါပြီ။” လို့ ဘင်္ဂလားဒေ့ရှ်နိုင်ငံ၊ တက္ကနာဖ်မှကုန်သည်တဦးက Border News Agency ကို ပြောပါတယ်။
အဲဒီအာရက္ခ-ဘင်္ဂလားဒေ့ရှ် မောင်တောမြို့ကို အာရက္ခတပ်တော်သိမ်းပိုက်ထိန်းချုပ်ပြီးနောက် နှစ်နိုင်ငံနယ်စပ်ကုန်သွယ်ရေးရပ်တန့်နေခဲ့တာဖြစ်ပါတယ်။
အဲဒီနောက်တနှစ်ကျော်ခန့်အကြာမှ အာရက္ခပြည်သူ့တော်လှန်ရေးအစိုးရနဲ့ ဘင်္ဂလားဒေ့ရှ်အစိုးရကြား နှစ်နိုင်ငံနယ်စပ်ကုန်သွယ်ရေး စတင်တာမို့ကုန်သည်တွေအပါအဝင် နှစ်နိုင်ငံနယ်စပ်နေပြည်သူတွေအတွက်အဆင်ပြေလာနိုင်တယ်လို့ ပြည်သူတွေက ဆိုကြပါတယ်။
“နားလည်မှုနဲ့သွားလာနေကြရတာတွေ၊ ခိုးပြီးသွားလာလုပ်နေကြရတာတွေကလုံးဝအဆင်မပြေပါဘူး။ ခုလိုမျိုးနှစ်နိုင်ငံအစိုးရသဘောတူပြီး တရားဝင်ကုန်သွယ်နိုင်တာကပိုကောင်းပါတယ်။ ဆေးကု၊ စျေးဝယ်ဖို့အတွက်လည်း တရားဝင်သွားလာခွင့်တွေရစေချင်ပါတယ်။ ကျနော်တို့အတွက် ပိုပြီးအဆင်ပြေလာမယ်လို့မျှော်လင့်ပါတယ်။” လို့ မောင်တောမြို့ခံတဦးက Border News Agency ကို ပြောပါတယ်။
အဲဒီအာရက္ခ-ဘင်္ဂလားဒေ့ရှ်နယ်စပ်တလျှောက်ကို အာရက္ခတပ်တော်ထိန်းချုပ်ထားပြီး အာရက္ခပြည်သူ့တော်လှန်ရေးအစိုးရက အုပ်ချုပ်ရေးအပါအဝင် နယ်စပ်ကုန်သွယ်ရေးကိုစီမံဆောင်ရွက်နေပါတယ်။
အဲဒီလိုနှစ်နိုင်ငံအစိုးရသဘောတူညီချက်တွေနဲ့ နှစ်နိုင်ငံနယ်စပ်ကုန်သွယ်ရေးမစတင်ခင်ကတည်းက နားလည်မှုတွေနဲ့ ကျွဲ၊ နွား၊ သစ်တွေကို မောင်တောနယ် စပ်ကတင်ပို့နေခဲ့ကြပါတယ်။
