Border News Agency
စစ်ကိုင်း၊ မေ ၆။
ပြည်သူ့အာဏာကိုပြည်သူ့ထံ မလွဲမသွေ ပြန်လည်အပ်နှင်းနိုင်ဖို့အတွက် တိုင်းရင်းသားညီနောင်မဟာမိတ်တပ်ဖွဲ့တွေနဲ့အတူ စုစည်းညီညွတ်စွာလက်တွဲပြီး အောင်ပွဲဆီကို ဆက်လက်ချီတက်သွားမယ်လို့ ပြည်ထောင်စုဝန်ကြီးချုပ် မန်းဝင်းခိုင်သန်းက PDF ၅ နှစ်ပြည့် မိန့်ခွန်းမှာ ထည့်သွင်းပြောကြားလိုက်ပါတယ်။
ပြီးခဲ့တဲ့ ၅ နှစ်တာအတွင်း ရရှိခဲ့တဲ့စစ်ရေးအောင်မြင်မှုတွေဟာ PDF တခုတည်းကြောင့်မဟုတ်ဘဲ မဟာမိတ်တိုင်းရင်းသားအဖွဲ့အစည်းတွေနဲ့ စစ်ဒေသအလိုက် ဟန်ချက်ညီညီ ပူးပေါင်းဆောင်ရွက်နိုင်မှုကြောင့် အာဏာသိမ်းစစ်တပ်ရဲ့ ဗျူဟာကုန်းတွေနဲ့ မြို့ရွာတွေကို သိမ်းပိုက်နိုင်ခဲ့တာလို့ဆိုပါတယ်။
တော်လှန်ရေးခရီးဟာ ပန်းတိုင်မရောက်မချင်းလျှောက်လှမ်းရမယ့် ခရီးရှည်ကြီးဖြစ်လို့ ဘယ်သူက ပိုပြီးဇွဲရှိမလဲဆိုတဲ့အချက်က အဆုံးအဖြတ်ပေးမှာဖြစ်ပြီး ပင်ပန်းတဲ့အခါ ခဏနားနိုင်ပေမယိ့ လမ်းဆုံးအထိဆက်လျှောက်ရမှာဖြစ်သလို အချင်းချင်း ပြန်တွဲခေါ်သွားကြဖို့လည်း ရဲဘော်တွေကို တိုက်တွန်းခဲ့ပါတယ်။
ဒါ့အပြင် တပ်တခုရဲ့အင်အားဟာ ကျင့်ဝတ် စောင့်ထိန်းမှုအပေါ်မှာမူတည်ကြောင်း၊လူထုကို ဝန်ထုပ်ဝန်ပိုးဖြစ်စေမယ့် လုပ်နည်းလုပ်ဟန်တွေကို ရှောင်ကြဉ်ပြီး ပြည်သူကို မျက်နှာမူကာ လူသားဆန်မှုဆိုတဲ့ ဒီမိုကရေစီတန်ဖိုးတွေကို လက်ကိုင်ထားပြီး ရှေ့ဆက်ရမယ်လို့ မှာကြားပါတယ်။
မဟာမိတ်တွေရဲ့ စုစည်းမှု၊ ပြည်သူလူထုရဲ့ ထောက်ခံမှုတွေနဲ့အတူ အာဏာသိမ်းစစ်အာဏာရှင်စနစ်ကို အမြစ်ပြတ်ချေမှုန်းပြီး အားလုံးတန်းတူညီမျှတဲ့ ဖက်ဒရယ်ဒီမိုကရေစီ ပြည်ထောင်စုကြီးကို မကြာမီ မလွဲမသွေ တည်ဆောက်နိုင်တော့မှာကို အပြည့်အဝယုံကြည်တယ်လို့ဆိုပါတယ်။
