Border News Agency
နေပြည်တော်၊ မေ ၇။
အာဏာသိမ်းစစ်တပ်ဟာအမေရိကန်သမ္မတ ထရမ့်ရဲ့ အကြံပေးဟောင်း ရော်ဂျာစတုန်းကို တစ်လ ဒေါ်လာ ၅၀,၀၀၀ နဲ့ လော်ဘီလုပ်ဖို့ ငှားထားတယ်လို့ အမေရိကန်အစိုးရရဲ့ (FARA) မှတ်တမ်းတွေအရ သိရပါတယ်။
အဲဒီလုပ်ရပ်ဟာ ပိတ်ဆို့မှုတွေကို ရှောင်ဖို့ ကြိုးစားတာဖြစ်လို့ Justice For Myanmar (JFM) အဖွဲ့က ရှုတ်ချလိုက်ပါတယ်။
အာဏာသိမ်းစစ်တပ်ရဲ့ပြန်ကြားရေးဝန်ကြီးဌာနနဲ့ DCI Group တို့ကြား ချုပ်ထားတဲ့ ဒေါ်လာ ၃ သန်းတန် စာချုပ်မှာ ရော်ဂျာစတုန်းက အကြံပေးအဖြစ် လုပ်ရမှာပါ။
ရော်ဂျာစတုန်းဟာ ၂၀၁၉ ခုနှစ်က ကွန်ဂရက်ကို လိမ်ညာထွက်ဆိုမှုနဲ့ ထောင်ကျခဲ့ဖူးပြီး ၂၀၂၀ မှာ သမ္မတထရမ့်က လွတ်ငြိမ်းခွင့်ပေးခဲ့သူ ဖြစ်ပါတယ်။
အာဏာသိမ်းစစ်တပ်ဟာ ပိတ်ဆို့မှုတွေကို ရှောင်ဖို့အတွက် နစက (SAC) ကို ဖျက်သိမ်းပြီး နိုင်ငံတော်လုံခြုံရေးနဲ့ အေးချမ်းရေးကော်
မရှင် (SSPC) ဆိုပြီး နာမည်ပြောင်းခဲ့ပါတယ်။
အဲဒီနာမည်မပြောင်းခင် ကတည်းက ကြိုလက်မှတ်ထိုးထားတဲ့ ဒီစာချုပ်ဟာ ပိတ်ဆို့မှု ဟာကွက်တွေကို အသုံးချဖို့ ရည်ရွယ်ထားတာပါ။
ဒီစာချုပ်ဟာ သယံဇာတနဲ့ ကုန်သွယ်ရေးကဏ္ဍမှာ အမေရိကန်နဲ့ ဆက်ဆံရေး ပြန်ကောင်းအောင် လုပ်ဖို့ ဖြစ်ပါတယ်။
ဒါပေမယ့်အာဏာသိမ်းစစ်တပ်ဟာ သယံဇာတတွေကို အဓမ္မယူပြီး ရတဲ့ငွေနဲ့ ပြည်သူတွေကို တိုက်ခိုက်နေသလို လူသားချင်းစာနာမှု အကူအညီတွေကိုလည်း လက်နက်သဖွယ် အသုံးချနေတယ်လို့ JFM က ထောက်ပြပါတယ်။
JFM ပြောရေးဆိုခွင့်ရှိသူ မရတနာမောင်က စစ်ရာဇဝတ်မှုကျူးလွန်နေသူတွေဆီက အကျိုးအမြတ်ယူနေတဲ့ ရော်ဂျာစတုန်းနဲ့ DCI Group တို့ရဲ့ လုပ်ရပ်ကို ဝေဖန်လိုက်ပြီး နိုင်ငံတကာ အစိုးရတွေအနေနဲ့ အာဏာသိမ်းစစ်တပ်ရဲ့ အမည်ပြောင်းမှုကြောင့် ဖြစ်လာတဲ့ ပိတ်ဆို့မှု ဟာကွက်တွေကို အမြန်ဆုံး ပိတ်ပစ်ဖို့ တိုက်တွန်းထားပါတယ်။
