Border News Agency
တောင်ကိုရီးယား၊မေ ၁၂။
ဟောမုဇ်ရေလက်ကြားမှာ တောင်ကိုရီးယား ပိုင်ရှင်ကုမ္ပဏီက မောင်းနှင်တဲ့ကုန်တင်သင်္ဘောတစီး တိုက်ခိုက်ခံရတာနဲ့ ပတ်သက်ပြီး တောင်ကိုရီးယားသမ္မတအိမ်ဖြူတော်က မေလ ၁၁ ရက်၊မနေ့ကပြင်းပြင်းထန်ထန် ကန့်ကွက်ရှုတ်ချလိုက်ပါတယ်။
အဲဒီတိုက်ခိုက်မှုဟာ ဘယ်သူ့လက်ချက်လဲဆိုတာ အတည်ပြုပြီးတာနဲ့ ထိုက်တန်တဲ့ တုံ့ပြန်မှုတွေ လုပ်သွားမယ်လို့လည်း ဆိုပါတယ်။
အဲဒီ တိုက်ခိုက်ခံရတဲ့သင်္ဘောဟာ HMM ကုမ္ပဏီကပိုင်တဲ့ Namuဆိုတဲ့ သင်္ဘောဖြစ်ပြီး ယူအေအီး (UAE) ကမ်းလွန်ပင်လယ်ပြင်မှာ ရှိနေတုန်း တိုက်ခိုက်ခံရတာပါ။
သင်္ဘောရဲ့ နောက်ပိုင်းအောက်ခြေမှာ ထိခိုက်ပျက်စီးသွားပြီး စက်ခန်းထဲမှာလည်း မီးလောင်မှုဖြစ်ခဲ့တယ်လို့ စုံစမ်းစစ်ဆေးရေး အဖွဲ့တွေက ပြောပါတယ်။
အမေရိကန်သမ္မတ ထရမ့်ကတော့ ဒီတိုက်ခိုက်မှုဟာ အီရန်ရဲ့လက်ချက်ဖြစ်တယ်လို့ စွပ်စွဲထားပြီး ပင်လယ်ရေကြောင်း လုံခြုံရေးအတွက် အမေရိကန်ဦးဆောင်တဲ့ အဖွဲ့မှာပါဝင်ဖို့ တောင်ကိုရီးယားကို တိုက်တွန်းနေပါတယ်။
ဒါပေမယ့် အီရန်ဘက်ကတော့ ဒီကိစ္စမှာ သူတို့မှာ တာဝန်မရှိကြောင်းနဲ့ ဘာမှမသိရသေးကြောင်း ငြင်းဆိုထားပါတယ်။
တောင်ကိုရီးယား အမျိုးသားလုံခြုံရေးအကြံပေး ပုဂ္ဂိုလ်ကတော့ အခုထိခိုက်သွားတဲ့နေရာဟာ သင်္ဘောရဲ့ ရေအောက်ပိုင်းဖြစ်နေလို့ အစောပိုင်းမှာ သတိမထားမိခဲ့တာလို့ ရှင်းပြပါတယ်။
လောလောဆယ် ဒူဘိုင်းဆိပ်ကမ်းမှာ သင်္ဘောကို သေချာစစ်ဆေးနေပြီး တိုက်ခိုက်မှုရဲ့ မူလအရင်းအမြစ်ကို ရှာဖွေနေကြပါတယ်။
ဒီတိုက်ခိုက်မှုဟာ ကူးသန်းရောင်းဝယ်ရေးသင်္ဘောတစီးကို အကြောင်းမဲ့ပစ်မှတ်ထားတာဖြစ်လို့ ဘယ်လိုမှ လက်ခံနိုင်စရာမရှိဘူးလို့ တောင်ကိုရီးယားအစိုးရက ဆိုပါတယ်။
ဟောမုဇ်ရေလက်ကြားမှာ စစ်ရေးတင်းမာမှုတွေရှိနေပေမယ့် ဒီသင်္ဘောဟာ ဘယ်စည်းကမ်းကိုမှ ချိုးဖောက်ခဲ့တာမရှိဘူးလို့လည်း အတည်ပြုထားပါတယ်။
