Border News Agency
အမေရိကန်၊မေ ၁၄။
အမေရိကန်နဲ့ အီရန်ကြား ဧပြီလ ၈ ရက်နေ့ကတည်းက သဘောတူထားတဲ့ အပစ်ရပ်ရေးဟာ အခုအချိန်မှာ အလွန်စိုးရိမ်ရတဲ့ အခြေအနေကို ရောက်နေပြီး နှစ်ဖက်စလုံးက အလျှော့မပေးဘဲ တင်းခံနေကြပါတယ်။
သမ္မတ ထရန့်ကတော့ အခုအပစ်ရပ်ရေးဟာ အသက်ဆက်ရုံပဲရှိတော့တယ်လို့ ပြောဆိုထားပြီး စစ်ပွဲတွေ ပြန်စလာနိုင်တဲ့ အရိပ်အယောင်တွေလည်း ပြနေပါတယ်။
အီရန်ဘက်ကတော့ လက်ဘနွန်အပါအဝင် စစ်မျက်နှာအားလုံးမှာ တိုက်ပွဲတွေရပ်တန့်ဖို့နဲ့ သူတို့ရဲ့ နျူကလီးယား အစီအစဉ်အပေါ် ပိတ်ဆို့မှုတွေကို ဖယ်ရှားပေးဖို့ တောင်းဆိုနေပါတယ်။
ဒါပေမယ့် ထရန့်ကတော့ အီရန်ရဲ့ တောင်းဆိုချက်တွေကို “အမှိုက်” လို့ပဲ ခေါ်ဆိုပြီး ပယ်ချထားပါတယ်။
လက်ရှိမှာ ထရန့်ဟာ စစ်ပွဲကို ပြန်စမလား ဒါမှမဟုတ် အီရန်ကို အလျှော့ပေးမလားဆိုတဲ့ ရွေးချယ်စရာ လမ်းနှစ်ခုကြားမှာ အကျပ်ရိုက်နေပါတယ်။
စစ်ပွဲပြန်စရင်လည်း အမေရိကန်ရဲ့ ခဲယမ်းမီးကျောက် လက်ကျန်တွေ နည်းပါးနေတာကြောင့် တခြားဒေသတွေက ခြိမ်းခြောက်မှုတွေကို တုံ့ပြန်ဖို့ ခက်ခဲသွားနိုင်တယ်လို့ ကျွမ်းကျင်သူတွေက သတိပေးထားပါတယ်။
အမေရိကန်ပြည်တွင်းမှာလည်း စစ်ပွဲကြောင့် လောင်စာဆီနဲ့ ဓာတ်မြေဩဇာစျေးနှုန်းတွေ တက်နေတာကြောင့် လူထုရဲ့ မကျေနပ်မှုတွေ ရှိနေပါတယ်။
စစ်တမ်းတွေအရ အမေရိကန်ပြည်သူ ၃ ပုံ ၂ ပုံလောက်ဟာ ဒီစစ်ပွဲကို ဘာကြောင့် တိုက်နေရသလဲဆိုတာ ရှင်းရှင်းလင်းလင်း မသိကြဘဲ ထရန့်ရဲ့ လူထုထောက်ခံမှုနှုန်းကလည်း ၃၆ ရာခိုင်နှုန်းအထိ ကျဆင်းနေပါတယ်။
ကျွမ်းကျင်သူတွေကတော့ ထရန့်အနေနဲ့ အီရန်နဲ့ သဘောတူညီချက်တစ်ခုခုရဖို့အတွက် နျူကလီးယားကိစ္စ ဒါမှမဟုတ် ဟော်မုဇ်ရေလက်ကြား ထိန်းချုပ်မှုကိစ္စ တစ်ခုခုမှာတော့ အလျှော့ပေးရနိုင်ခြေရှိတယ်လို့ သုံးသပ်နေကြပါတယ်။
ထရန့်ဟာ စီးပွားရေးနဲ့ ကုန်စျေးနှုန်းတွေကို ဂရုစိုက်သူဖြစ်တာကြောင့် နောက်ဆုံးမှာတော့ အောင်ပွဲတစ်ခုအဖြစ် ပုံဖော်ပြီး အပေးအယူလုပ်လာနိုင်တယ်လို့ ခန့်မှန်းနေကြပါတယ်။
