Border News Agency
အိန္ဒိယ၊မေ ၁၄။
အိန္ဒိယနိုင်ငံ၊မဏိပူရပြည်နယ်မှာ အသင်းတော်ကိစ္စတွေနဲ့ ခရီးသွားနေတဲ့ သာဒိုခရစ်ယာန်အသင်းတော် ခေါင်းဆောင်တွေဟာမေလ ၁၃ ရက်၊မနက်ပိုင်းမှာ ခြုံခိုတိုက်ခိုက်ခံရလို့ ၄ ဦး သေဆုံးသွားပါတယ်။
အဲဒီ တိုက်ခိုက်မှုကို NSCN (Kacha Naga) လက်နက်ကိုင်အဖွဲ့က လုပ်ဆောင်ခဲ့တာလို့ ဒေသတွင်းမီဒီယာတွေမှာဖော်ပြပါတယ်။
အဲဒီအသင်းတော်ခေါင်းဆောင်တွေဟာ သူတို့ရဲ့ ဘာသာရေးလုပ်ငန်းစဉ်တွေအတွက် သွားလာနေတုန်း လမ်းခုလတ်မှာ အခုလို ရုတ်တရက် ဝိုင်းဝန်းပစ်ခတ်ခံရတာလို့ဆိုပါတယ်။
အဲဒီလိုပစ်ခတ်မှုကြောင့် အသင်းတော်ခေါင်းဆောင် ၄ ဦးဟာ အခင်းဖြစ်နေရာမှာတင် သေဆုံးခဲ့ပါတယ်။
ဒါ့အပြင် အတူလိုက်ပါလာတဲ့အများအပြားလည်း ဒဏ်ရာအပြင်းအထန် ရသွားခဲ့ကြတယ်လို့ဆိုပါတယ်။
အဲဒီဒဏ်ရာရရှိထားသူတွေကို နီးစပ်ရာ ဆေးရုံတွေဆီ ပို့ဆောင်ပြီး ဆေးကုသမှု ပေးနေရတယ်လို့ဆိုပါတယ်။
မဏိပူရပြည်နယ်အတွင်းမှာ လူမျိုးစုလက်နက်ကိုင်တွေနဲ့ ပဋိပက္ခတွေ ရှိနေတတ်ပေမယ့် အခုလို ဘာသာရေးခေါင်းဆောင်တွေအပေါ် တိုက်ခိုက်မှုကြောင့် ဒေသတွင်းမှာ စိုးရိမ်မှုတွေ ပိုပြီး မြင့်တက်လာနေပါတယ်။
