Border News Agency
နေပြည်တော်၊ မေ ၁၈။
မြန်မာနိုင်ငံမှာ စစ်အာဏာသိမ်းပြီး ၅ နှစ်ကျော်ကြာလာတဲ့အထိ မိခင်ဖြစ်သူ ဒေါ်အောင်ဆန်းစုကြည် အသက်ရှင်လျက်ရှိနေကြောင်း လွတ်လပ်ပြီးယုံကြည်စိတ်ချရတဲ့အဖွဲ့အစည်းတွေက အတည်ပြုထားတဲ့သက်သေ ဒီနေ့အထိမရှိသေးဘူးလို့ သားငယ်ဖြစ်သူ ကိုထိန်လင်းက ဗြိတိန်ပါလီမန်ရှေ့ဆန္ဒပြပွဲမှာ ထုတ်ဖော်ပြောဆိုလိုက်ပါတယ်။
အဲဒီလန်ဒန်မြို့ရှိ ယူကေပါလီမန်ရှေ့မှာ မေလ ၁၇ ရက်နေ့က မြန်မာ့အရေးလှုပ်ရှားသူတွေ၊ ထောက်ခံသူတွေနဲ့အတူစုဝေးပြီး ဒေါ်အောင်ဆန်းစုကြည်အပါအဝင် မြန်မာနိုင်ငံက နိုင်ငံရေးအကျဉ်းသားအားလုံးလွတ်မြောက်ရေးအတွက် တောင်းဆိုရာမှာ အခုလိုထည့်သွင်းပြောကြားခဲ့တာ ဖြစ်ပါတယ်။
အသက် ၈၁ နှစ်အရွယ်ရှိပြီဖြစ်တဲ့ နိုဘယ်ငြိမ်းချမ်းရေးဆုရှင် ဒေါ်အောင်ဆန်းစုကြည်ကို အာဏာသိမ်းစစ်တပ်က လျှို့ဝှက်နေရာတခုကနေ နောက်ထပ်လျှို့ဝှက်နေရာတခုဆီကို ရွှေ့ပြောင်းထိန်းသိမ်းနေတာဟာ လွတ်မြောက်စေတာမဟုတ်ဘူးလို့ ဆိုပါတယ်။
မိခင်ဖြစ်သူဟာ ဒီနေ့အချိန်အထိ ဓားစာခံတဦးအဖြစ်သာ မတရားဖမ်းဆီးထိန်းသိမ်းခံနေရဆဲဖြစ်တယ်လို့လည်း သူကဝေဖန်ထောက်ပြထားပါတယ်။
ပြီးခဲ့တဲ့ကာလတွေအတွင်း ဒေါ်အောင်ဆန်းစုကြည်ရဲ့ ကျန်းမာရေးအခြေအနေနဲ့ပတ်သက်ပြီး စိုးရိမ်ရတဲ့သတင်းတွေဆက်တိုက်ထွက်ပေါခဲ့ပေမယ့် အာဏာသိမ်းစစ်တပ်ဘက်က မိသားစုဝင်တွေအပါအဝင် နိုင်ငံတကာသံတမန်တွေ၊ လွတ်လပ်တဲ့ ဆရာဝန်အဖွဲ့အစည်းတွေကိုပါ လူကိုယ်တိုင်တွေ့ဆုံခွင့် လုံးဝပိတ်ပင်ထားခဲ့တာဖြစ်ပါတယ်။
အခုလိုသတင်းအမှောင်ချပြီး လျှို့ဝှက်ချုပ်နှောင်ထားတာဟာ ဒေါ်အောင်ဆန်းစုကြည်ရဲ့ အသက်အန္တရာယ်နဲ့ ကျန်းမာရေးအတွက် မိသားစုဝင်တွေနဲ့ ပြည်သူတွေအကြား စိုးရိမ်စိတ်ပိုမိုမြင့်တက်စေတယ်လို့ တော်လှန်ရေးအင်အားစုတွေက ထောက်ပြကြပါတယ်။
ဒီဆန္ဒပြပွဲအတွင်းမှာ ကိုထိန်လင်းနဲ့ လှုပ်ရှားသူတွေက အာဏာသိမ်းစစ်တပ်အနေနဲ့ ဒေါ်အောင်ဆန်းစုကြည် သက်ရှိထင်ရှားရှိနေကြောင်း ခိုင်မာတဲ့သက်သေပြသဖို့ အရေးဆိုခဲ့ကြပါတယ်။
အဲဒီအပြင်ဗြိတိန်အစိုးရနဲ့ နိုင်ငံတကာအသိုင်းအဝိုင်းအနေနဲ့လည်း မြန်မာနိုင်ငံက နိုင်ငံရေးအကျဉ်းသားအားလုံး ချက်ချင်းလွတ်မြောက်ရေးအတွက် အာဏာသိမ်းစစ်တပ်အပေါ် ဖိအားတွေ ပိုမိုပြင်းထန်စွာမြှင့်တင်ပေးဖို့ တောင်းဆိုခဲ့ကြပါတယ်။
စစ်အာဏာသိမ်းပြီးနောက်ပိုင်း ဒေါ်အောင်ဆန်းစုကြည်ဟာ မတရားပုဒ်မတွေနဲ့ ထောင်ဒဏ်အရှည်ကြီး ချမှတ်ခံထားရတာဖြစ်ပြီး လတ်တလောနေပြည်တော်အချုပ်ကနေ ဘယ်နေရာကိုပြောင်းရွှေ့ချုပ်နှောင်ထားမှန်း မသိရဘဲ သတင်းအစအန ပျောက်ဆုံးနေတာဖြစ်ပါတယ်။
သားဖြစ်သူ ကိုထိန်လင်းကတော့ မိခင်ဖြစ်သူနဲ့ မြန်မာပြည်သူတွေ လူ့အခွင့်အရေးပြန်လည်ရရှိဖို့အတွက် နိုင်ငံတကာမှာ လှုံ့ဆော်မှုတွေကို စဉ်ဆက်မပြတ် ဆက်လက်လုပ်ဆောင်သွားမယ်လို့ အသိပေးထားပါတယ်။
