Border News Agency
အီရန်၊ မေ ၁၈။
အီရန်နိုင်ငံအနေနဲ့ အချိန်သိပ်မကျန်တော့သလို မြန်မြန်ဆန်ဆန်ရုန်းထွက်လှုပ်ရှားတာ ပိုကောင်းလိမ့်မယ်လို့ အမေရိကန်သမ္မတ ဒေါ်နယ်ထရန့်က သူ့ရဲ့ Truth Social လူမှုကွန်ရက်ကနေတဆင့် သတိပေးလိုက်ပါတယ်။
ထရန့်ဟာ အီရန်ရဲ့တောင်းဆိုချက်တွေကို လုံးဝလက်မခံနိုင်စရာမရှိဘူးလို့ ပယ်ချထားပြီး ပြီးခဲ့တဲ့ဧပြီလကမှ ယာယီသဘောတူထားတဲ့ အပစ်ရပ်စဲရေးဟာလည်း လက်ရှိမှာ အသက်ရှူစက်အကြီးအကျယ် တပ်ထားရတဲ့အခြေအနေမှာ ရှိနေတယ်လို့ဆိုပါတယ်။
အခုသတိပေးချက်ဟာ ထရန့်အနေနဲ့ အစ္စရေးဝန်ကြီးချုပ် ဘင်ဂျမင် နေတန်ယာဟုနဲ့ စကားပြောဆိုဖို့ရှိနေချိန်မှာ ထွက်ပေါ်လာတာဖြစ်ပါတယ်။
တချိန်တည်းမှာပဲ အီရန်ဘက်က တင်သွင်းတဲ့ နောက်ဆုံးငြိမ်းချမ်းရေး အဆိုပြုချက်တွေအပေါ် အမေရိကန်ဘက်က ခိုင်မာတဲ့လိုက်လျောမှုတစုံတရာ ပြုလုပ်ဖို့ပျက်ကွက်ခဲ့တာကို အီရန်မီဒီယာတွေက ဝေဖန်နေကြပါတယ်။
ဝါရှင်တန်ရဲ့ လိုက်လျောမှုမရှိတဲ့လုပ်ရပ်ဟာ လက်ရှိဆွေးနွေးပွဲတွေကို အကျပ်အတည်းဆိုက်စေလိမ့်မယ်လို့ အီရန်အစိုးရပိုင်မီဒီယာတွေက ဖော်ပြပါတယ်။
အီရန်ရဲ့ အဆိုပြုချက်ထဲမှာတော့ ဟစ်ဇ်ဘိုလာအပေါ် အစ္စရေးရဲ့တိုက်ခိုက်မှုတွေ ရပ်တန့်ဖို့၊ အမေရိကန်ရေတပ်က အီရန်ဆိပ်ကမ်းတွေ ပိတ်ဆို့ထားမှုကိုရုပ်သိမ်းဖို့နဲ့ စစ်ပွဲပျက်စီးမှုအတွက် လျော်ကြေးပေးဖို့ စတဲ့အချက်တွေ ပါဝင်နေတာပါ။
ဒီတောင်းဆိုချက်တွေကို တုံ့ပြန်တဲ့အနေနဲ့ ဝါရှင်တန်ဘက်က ကန့်သတ်ချက် ၅ ချက် ပြန်လည်ချမှတ်ခဲ့ပြီး အဲဒီအထဲမှာအီရန်အနေနဲ့ နျူကလီးယားစက်ရုံတခုတည်းကိုပဲ ဆက်လက်လည်ပတ်ဖို့နဲ့ သန့်စင်မှုမြင့်မားတဲ့ ယူရေနီယံသိုလှောင်မှုတွေကို အမေရိကန်ဆီ လွှဲပြောင်းပေးဖို့ တောင်းဆိုထားတယ်လို့သိရပါတယ်။
ဒါပေမယ့် သမ္မတထရန့်က အီရန်ရဲ့ နျူကလီးယားအစီအစဉ်ကို အနှစ် ၂၀ အထိ ရပ်ဆိုင်းထားမယ်ဆိုရင် လက်ခံသွားမယ်လို့ အရိပ်အမြွက် ပြောကြားခဲ့တာကြောင့် ဒါဟာ နျူကလီးယားအစီအစဉ်ကို လုံးဝအဆုံးသတ်ရမယ်ဆိုတဲ့ အရင်ရပ်တည်ချက်ကနေ အနည်းငယ် အလျော့ပေးလိုက်တဲ့ သဘောလည်း ဖြစ်နိုင်ပါတယ်။
အမေရိကန်နဲ့ အစ္စရေးပူးပေါင်းတပ်တွေဟာ ပြီးခဲ့တဲ့ဖေဖော်ဝါရီ လ၂၈ ရက်ကတည်းက အီရန်အပေါ် အကြီးအကျယ် လေကြောင်းတိုက်ခိုက်မှုတွေ လုပ်ဆောင်ခဲ့တာဖြစ်ပြီး ဆွေးနွေးပွဲတွေလုပ်နိုင်ဖို့အတွက် အပစ်ရပ်ထားပေမဲ့ ရံဖန်ရံခါပစ်ခတ်မှုတွေတော့ရှိနေဆဲ ဖြစ်ပါတယ်။
တဖက်မှာလည်း အီရန်ဟာ ကမ္ဘာ့ရေနံနဲ့ သဘာဝဓာတ်ငွေ့ရည် (LNG) ၂၀ ရာခိုင်နှုန်းခန့် ဖြတ်သန်းသယ်ယူနေတဲ့ အရေးပါတဲ့ ဟော်မုဇ်ရေလက်ကြားကို ထိရောက်စွာ ဆက်လက်ပိတ်ဆို့ထားဆဲ ဖြစ်တာကြောင့် ကမ္ဘာ့ရေနံဈေးနှုန်းတွေ အကြီးအကျယ်မြင့်တက်နေတဲ့ဂယက်ကို ရင်ဆိုင်နေရပါတယ်။
အမေရိကန်ဘက်ကတော့ တဟီရန်အစိုးရအနေနဲ့ သူတို့ရဲ့ စည်းကမ်းချက်တွေကို သဘောတူလာအောင် ဖိအားပေးတဲ့အနေနဲ့ အီရန်ဆိပ်ကမ်းတွေကို ပိတ်ဆို့အရေးယူမှုတွေ ဆက်လုပ်ထားတာဖြစ်ပါတယ်။
အခုပဋိပက္ခမှာ ပါကစ္စတန်နိုင်ငံက အမေရိကန်နဲ့ အီရန်အကြား စေ့စပ်ညှိနှိုင်းပေးသူအဖြစ် အလယ်ကနေ ကြိုးပမ်းဆောင်ရွက်ပေးနေပေမယ့်လည်း နှစ်ဖက်စလုံးရဲ့ သဘောထားနဲ့ တောင်းဆိုချက်တွေကတော့ လက်ရှိအချိန်အထိအလှမ်းဝေးကွာနေဆဲ ဖြစ်ပါတယ်။
