Border News Agency
မြေပုံ၊ မေ ၁၉။
မြေပုံမြို့နယ်မှာမြေမြုပ်မိုင်းနင်းမိလို့ အရပ်သားတဦးခြေတဖက်ပြတ်ထွက်သွားတယ်လို့သိရပါတယ်။
အဲဒီမြေပုံမြို့နယ်၊မောင်းချောင်းရွာမှ အသက်လေးဆယ်အရွယ်ဦးမောင်ဝင်းလှိုင်ခြေတဖက်ပြတ်ထွက်သွားတာပါ။
ဦးမောင်ဝင်းလှိုင်ဟာ မေလ ၁၈ရက်၊ နေ့လည် ၃ နာရီအချိန်ခန့်ကဝါးခုတ်ဖို့အတွက်အာဏာသိမ်းစစ်တပ်စခန်းချခဲ့တဲ့နေရာကိုသွားတဲ့အချိန် မြေမြုပ်မိုင်းတလုံးကို တက်နင်းမိလို့ ပေါက်ကွဲမှုဖြစ်ပွားခဲ့တာလို့ ဆိုပါတယ်။
အဲဒီလိုပေါက်ကွဲမှုဖြစ်ပွားခဲ့တာကြောင့် ဦးမောင်ဝင်းလှိုင်ရဲ့ညာဖက်ခြေထောက် ခြေမျက်စိအောက်ကနေပြတ်ထွက်သွားပြီး ညာဖက်မျက်လုံးတဖက်လည်းပျက်စီးကာ ခန္ဓာကိုယ်အနှံ့ဒဏ်ရာတွေရသွားခဲ့တယ်လို့ ဆိုပါတယ်။
အာရက္ခတပ်တော်ဟာ သူတို့ထိန်းချုပ်မြို့နယ်တွေမှာ မိုင်းရှင်းလင်းရေးတွေ လုပ်ဆောင်နေပေမယ့် အရပ်သားပြည်သူတွေကတော့ မြေမြုပ်မိုင်းအန္တရာယ်တွေ၊စစ်ကျန်လက်နက်အန္တရာယ်တွေကိုလည်း မကြာခဏကြုံတွေ့နေကြရသလို သေဆုံးဒဏ်ရာရထိခိုက်တာတွေ မကြာခဏဖြစ်နေကြတယ်လို့ အာရက္ခပြည်သူတွေက ဆိုကြပါတယ်။
အာရက္ခပြည်သူ့တော်လှန်ရေးအစိုးရဟာ မိုင်းအသိပညာပေးမှုတွေ၊ မြေမြုပ်မိုင်းအန္တရာယ်ဟောပြောပွဲတွေကို ပြည်သူလူထုတွေကြားမှာ လုပ်ဆောင်နေပြီး မိုင်းအသိပညာဝေတာတွေ၊ မိုင်းအန္တရာယ်ဆိုင်ရာ သတိပေးတာတွေကို ပုံမှန်လုပ်ဆောင်နေပါတယ်။
ဒါပေမယ့် အာရက္ခပြည်သူတွေဟာ စစ်ကော်မရှင်တပ်ရဲ့ မိုင်းတွေ၊ စစ်ကျန်လက်နက်အန္တရာယ်တွေကို မကြာခဏကြုံတွေ့နေကြရတာမို့ မိုင်းရှင်းလင်းပေးတာတွေ၊ မိုင်အသိပညာပေးတာတွေကို ပိုမိုဆောင်ရွက်ပေးဖို့ လိုအပ်နေသေးတယ်လို့ အာရက္ခပြည်သူတွေက ဆိုကြပါတယ်။
