Border News Agency
အီရန်၊ဇွန် ၆။
အီရန်နိုင်ငံဘက်ကဟော်မုဇ်ရေလက်ကြားနဲ့ အိမ်နီးချင်းပင်လယ်ကွေ့နိုင်ငံတွေကို ဦးတည်ပစ်ခတ်လိုက်တဲ့ ဘာလစ်စတစ်ဒုံးကျည်တွေနဲ့ တိုက်ခိုက်ရေးဒရုန်းတွေကို ဇွန်လ ၅ ရက်နေ့မှာ ကြားဖြတ်ပစ်ချ ဖျက်ဆီးလိုက်တယ်လို့ အမေရိကန်ဗဟိုစစ်ဌာနချုပ်က ထုတ်ပြန်ပါတယ်။
အီရန်ဟာ ဟော်မုဇ်ရေလက်ကြားရှိ ရေကြောင်းသွားလာရေးကို ခြိမ်းခြောက်နေတဲ့ တိုက်ခိုက်ရေးဒရုန်း ၄ စီးကို အမေရိကန်က ပစ်ချအပြီး နာရီပိုင်းအကြာမှာပဲ ကူဝိတ်နဲ့ ဘာရိန်းနိုင်ငံတွေဘက်ကို ဘာလစ်စတစ်ဒုံးကျည် ၇ စီးနဲ့ ထပ်မံပစ်ခတ် တိုက်ခိုက်ခဲ့တာ ဖြစ်ပါတယ်။
အဲဒီနောက် အမေရိကန်တပ်ဖွဲ့တွေက ထပ်မံဖြစ်ပွားလာမယ့် ရေကြောင်းတိုက်ခိုက်မှုတွေကို ကာကွယ်ဖို့အတွက် အီရန်ကမ်းရိုးတန်း ဂိုရွတ် (Goruk) နဲ့ ကက်ရှ်မန်ကျွန်း (Qeshm Island) ပေါ်က ရေဒါစခန်းတွေကို ပြန်လည်တိုက်ခိုက်ခဲ့ပါတယ်။
အခြေအနေဆန်းစစ်ချက်တွေအရ အီရန်ပစ်ခတ်လိုက်တဲ့ ဒုံးကျည် ၇ စီးထဲက ၆ စီးကို အမေရိကန်က ကြားဖြတ်ပစ်ချနိုင်ခဲ့ပြီး ကျန် ၁ စီးကတော့ ပစ်မှတ်ကိုမရောက်ဘဲ ပျက်ကျသွားခဲ့တယ်လို့ ဆိုပါတယ်။
အဲဒီတိုက်ခိုက်မှုကြောင့် အမေရိကန်စစ်ဘက်ဆိုင်ရာ ဝန်ထမ်းတွေ ထိခိုက်ဒဏ်ရာရတာမျိုး မရှိသလို၊ ဘာရိန်းနိုင်ငံမှာရှိတဲ့ အမေရိကန် ပဉ္စမမြောက်ရေတပ်ဌာနချုပ်ကို ထိခိုက်အောင် တိုက်ခိုက်နိုင်ခဲ့တယ်ဆိုတဲ့ အီရန်ဘက်က ထုတ်ဖော်ပြောဆိုချက်တွေဟာလည်း သတင်းအမှားတွေသာဖြစ်တယ်လို့ CENTCOM က တုံ့ပြန်ထားပါတယ်။
