Border News Agency
ကနေဒါ၊ ဇွန် ၆။
ဖက်ဒရယ်ဒီမိုကရေစီပြည်ထောင်စုပေါ်ထွန်းရေးဦးဆောင်ကောင်စီ (SCEF) ကိုယ်စားလှယ်အဖွဲ့ဟာ ကနေဒါနိုင်ငံ၊အွန်တာရီယိုပြည်နယ်၊ လန်ဒန်မြို့မှာရှိတဲ့ မြန်မာအသိုင်းအဝိုင်းနဲ့ တွေ့ဆုံပွဲကို ပြီးခဲ့တဲ့ မေလ ၂၉ ရက်နေ့က ကျင်းပခဲ့တယ်လို့ သိရပါတယ်။
အဲဒီကိုယ်စားလှယ်အဖွဲ့မှာ အမျိုးသားညီညွတ်ရေးအစိုးရ (NUG) နိုင်ငံခြားရေးဝန်ကြီး ဒေါ်ဇင်မာအောင်၊ ကရင်နီပြည်ကြားကာလအုပ်ချုပ်ရေးကောင်စီက နဲနယ်ပလိုနဲ့ ကရင်အမျိုးသားအစည်းအရုံး (KNU) ကစောနီးမရော့ဒ်တို့ ပါဝင်ကြတာဖြစ်ပါတယ်။
အဲဒီအပြင် ဒီတွေ့ဆုံဆွေးနွေးပွဲကို NUG သမ္မတအကြံပေးဦးကျော်ဇော်လည်း တက်ရောက်ခဲ့ပြီး အွန်တာရီယိုပြည်နယ် အနောက်တောင်ပိုင်းက မြန်မာအသိုင်းအဝိုင်းနဲ့ အချိန် ၂ နာရီနီးပါးကြာအောင် အပြန်အလှန်ဆွေးနွေးခဲ့ကြတာ ဖြစ်ပါတယ်။
အဲဒီဆွေးနွေးပွဲအတွင်း မြန်မာနိုင်ငံရဲ့ လက်ရှိအခြေအနေတွေ၊ SCEF ရဲ့ လုပ်ဆောင်ချက်တွေအပြင် နိုင်ငံတကာစည်းရုံးရေးမှာ လူငယ်တွေ ပါဝင်လှုပ်ရှားနိုင်မယ့် အခန်းကဏ္ဍနဲ့ ပြည်ပရောက်မြန်မာတွေအနေနဲ့ နွေဦးတော်လှန်ရေးကို ဘယ်လိုပံ့ပိုးကူညီနိုင်မလဲဆိုတာတွေကို တိုင်ပင်ခဲ့ကြတယ်လို့ ဆိုပါတယ်။
အဲဒီအပြင်ပြည်ပရောက် မြန်မာလူမှုအသိုင်းအဝိုင်း ကြုံတွေ့နေရတဲ့ စိန်ခေါ်မှုတွေနဲ့ ကျော်လွှားနိုင်မယ့် နည်းလမ်းတွေကိုပါ နှီးနှောဖလှယ်ခဲ့ကြပြီး ကိုယ်စားလှယ်အဖွဲ့ဘက်ကလည်း မိမိတို့ကို ခိုင်ခိုင်မာမာထောက်ခံပေးကြတဲ့အတွက် အထူးကျေးဇူးတင်ရှိကြောင်း ပြောကြားခဲ့ပါတယ်။
