Border News Agency
နေပြည်တော်၊ ဇူလိုင် ၁၆။
အာဆီယံအဖွဲ့ကအာဏာသိမ်းစစ်တပ်နဲ့ ပြန်လည်ထိတွေ့ဆက်ဆံလာတာဟာ စစ်အာဏာရှင်စနစ်ကိုတရားဝင်အောင်လုပ်ပေးရာရောက်နေပြီး မြန်မာပြည်သူတွေအတွက် ထိရောက်တဲ့ ရလဒ်ထွက်လာမှာမဟုတ်ဘူးလို့ လူ့အခွင့်အရေးဆိုင်ရာ အာဆီယံပါလီမန်အမတ်များအဖွဲ့ (APHR) က ဇူလိုင်လ ၁၅ ရက်နေ့မှာ သတိပေးထုတ်ပြန်လိုက်ပါတယ်။
ပြီးခဲ့တဲ့ငါးနှစ်တာအတွင်း ကျူးလွန်ခဲ့တဲ့ ရာဇဝတ်မှုတွေအတွက် တာဝန်ခံမှုမရှိဘဲ စစ်တပ်ကို အာဆီယံစားပွဲဝိုင်းမှာ နေရာပြန်ပေးတာဟာ တိုးတက်မှုမဟုတ်ကြောင်း APHR ဥက္ကဋ္ဌ Mercy Chriesty Barends က ထောက်ပြထားပါတယ်။
ဘန်ကောက်မှာ မြန်မာ့အရေး သီးသန့်ဆွေးနွေးတဲ့အာဆီယံနိုင်ငံခြားရေးဝန်ကြီးများ အစည်းအဝေးကို ဇူလိုင်လ၁၂ ရက်နေ့ကကျင်းပခဲ့ပြီးအဲဒီအစည်းအဝေးကို စစ်တပ်ရဲ့ နိုင်ငံခြားရေးဝန်ကြီး ပထမဆုံးအကြိမ် တက်ရောက်ခဲ့တာပါ။
ဒါပေမယ့် အစည်းအဝေးမတိုင်ခင်လေးတင် အာဏာသိမ်းစစ်တပ်ဘက်က အာဆီယံဘုံသဘောတူညီချက်ငါးချက်ကို ပြန်လည်သုံးသပ်ဖို့ အဆိုပြုခဲ့တာဟာ အာဆီယံမူဘောင်ကို တိုက်ရိုက်ပယ်ချလိုက်တာဖြစ်ပြီး တဖက်မှာလည်း စင်ကာပူနဲ့ မလေးရှားတို့က အဲဒီငါးချက်ကိုပဲ ဆက်ကိုင်စွဲထားတာကြောင့် မြန်မာ့အရေးမှာ အာဆီယံအတွင်း သဘောထားကွဲလွဲနေတာ ပိုထင်ရှားလာတယ်လို့ ဆိုပါတယ်။
မြေပြင်မှာလေကြောင်းရန်၊ဖမ်းဆီးမှုတွေနဲ့ ကြုံနေရတဲ့ ပြည်သူတွေအတွက် ဒီအစည်းအဝေးက ထူးခြားတဲ့ပြောင်းလဲမှု ဖြစ်လာမှာမဟုတ်ဘဲ အာဆီယံရဲ့ သံတမန်ရေး ချိန်ညှိမှုတွေဟာ ပြည်သူတွေတောင်းဆိုနေတဲ့ တရားမျှတမှုကို မျက်ကွယ်ပြုပြီး ရလာတဲ့အရာမျိုး မဖြစ်စေဖို့ APHR က တိုက်တွန်းထားပါတယ်။
အဲဒီအပြင် အာဏာသိမ်းစစ်တပ်နဲ့ ထိတွေ့ဆက်ဆံရာမှာ အကြမ်းဖက်မှုရပ်ဖို့၊အဖွဲ့အစည်းအားလုံး ဆွေးနွေးပွဲလုပ်ဖို့နဲ့ အကူအညီတွေ အဟန့်အတားမရှိပေးဖို့ စတဲ့ ဘုံသဘောတူညီချက်ငါးချက်ပါ အချက်တွေနဲ့ပဲ တိုင်းတာရမယ်လို့ ထပ်လောင်းပြောဆိုထားပါတယ်။
