Border News Agency
ထိုင်း၊ဩဂုတ် ၂၉။
ထိုင်းနိုင်ငံအလုပ်သမားဝန်ကြီးဌာနက အိမ်ရှင်အဖြစ်လက်ခံကျင်းပတဲ့ ၂၉ကြိမ်မြောက်အာဆီယံအလုပ်သမားဝန်ကြီးတွေ အစည်းအဝေးနဲ့ ဆက်စပ်အစည်းအဝေးတွေကို အလုပ်သမားဝန်ကြီးဌာနပြည်ထောင်စုဝန်ကြီး ဦးခင်မောင်စိုးဦးဆောင်တဲ့အဖွဲ့ ဩဂုတ် လ၂၆ ရက်မှ ၂၇ ရက်အထိ တက်ရောက်ခဲ့ပါတယ်။
အဲဒီအစည်းအဝေးမှာ အာဆီယံဒေသတွင်းလုပ်သားအင်အား ၃၅၇ သန်းဟာ ဒီဂျစ်တယ်စနစ်ကူးပြောင်းမှု၊အစိမ်းရောင်စီးပွားရေးကူးပြောင်းမှုနဲ့ လူဦးရေဖွဲ့စည်းပုံအပြောင်းအလဲ အစရှိတဲ့သုံးထပ်ကွေ့အပြောင်းအလဲတွေကို ရင်ဆိုင်နေရတယ်လို့ ပြည်ထောင်စုဝန်ကြီးက ပြောဆိုခဲ့တာပါ။
အဲဒီအပြင် ဒီဂျစ်တယ်နည်းပညာ၊ ကျန်းမာရေး၊ အစိမ်းရောင်စွမ်းအင်နဲ့ ဆောက်လုပ်ရေးစတဲ့ကဏ္ဍတွေမှာ ကျွမ်းကျင်မှုသင်တန်းတွေနဲ့ စံသတ်မှတ်ချက်တွေကို အာဆီယံမူဘောင်တွေအတိုင်း အသိအမှတ်ပြုဆောင်ရွက်ရေး ကိစ္စတွေကိုလည်းဆွေးနွေးခဲ့ကြပါတယ်။
နောက်ပြီးနည်းပညာလွှဲပြောင်းပေးရေး၊ တသက်တာသင်ယူရေးနဲ့အမျိုးသားကျွမ်းကျင်မှုအရည်အသွေး မူဘောင်တိုးမြှင့်ဖော်ဆောင်နေမှု အခြေအနေတွေကိုပါ ထည့်သွင်းပြောကြားခဲ့တာပါ။
အစည်းအဝေးအတွင်း အာဆီယံနဲ့အပေါင်းသုံးနိုင်ငံတွေကြား အလုပ်သမား ကဏ္ဍပူးပေါင်းဆောင်ရွက်ရေး၊ အာဆီယံထိပ်သီးအစည်းအဝေး ဆုံးဖြတ်ချက်တွေပူးတွဲ ထုတ်ပြန်နိုင်ရေးကိစ္စတွေကိုလည်းဆွေးနွေးခဲ့ကြပါတယ်။
