Border News Agency
မြောက်ဦး၊ ဩဂုတ် ၂၇။
အာရက္ခတပ်တော်(AA)ထိန်းချုပ်နယ်မြေတွေမှာ အခွန်အခပေးဆောင်တာတွေကို ပိုမိုလွယ်ကူစေဖို့နဲ့ အဂတိလိုက်စားမှုကင်းရှင်းစေဖို့အတွက် အွန်လိုင်းစနစ်၊မိုဘိုင်းဘဏ်စနစ်တွေနဲ့ပြောင်းလဲအကောင်အထည်ဖော်ဆောင်ရွက်သွားဖို့ ရက္ခိုင်အမျိုးသားအဖွဲ့ချုပ်(UL A)ပြင်ဆင်နေပါတယ်။
အနာဂတ်မှာခိုင်မာထိရောက်ပြီး တရားမျှတတဲ့အခွန်အခနဲ့ အခွင့်အရေးစနစ်တွေပေါ်ပေါက်လာစေဖို့အတွက် ကမ္ဘာ့စံနှုန်းတွေနဲ့အညီ လက်ရှိသမရိုးကျစီမံခန့်ခွဲမှုစနစ်မှ ခေတ်မီနည်းပညာစနစ်တွေဆီ ပြောင်းလဲတည်ဆောက်သွားမယ်လို့ဆိုပါတယ်။
အဲဒီအပြင်ကုန်သည်တွေနဲ့ ပြည်သူတွေရဲ့လုပ်ငန်းဆောင်ရွက်မှုဆိုင်ရာအချက်အလက်တွေကို ခေတ်မီကွန်ပျူတာစနစ်နဲ့ စနစ်တကျသိမ်းဆည်းပြီး မှန်ကန်တိကျတဲ့စနစ်ဖြစ်လာအောင် လုပ်ဆောင်သွားမယ်လို့ဆိုပါတယ်။
အဲဒီအကောက်ခွန်နဲ့ ကုန်စည်စစ်ဆေးရေးဂိတ်တွေမှာလည်း ပစ္စည်းတွေကိုစနစ်တကျနဲ့ အမြန်ဆုံးစစ်ဆေးနိုင်မယ့်နည်းလမ်းတွေကို ရှာဖွေဖော်ထုတ်ပြီး ကုန်သည်တွေအတွက် အချိန်ကြန့်ကြာမှုမရှိစေရေးစီမံဆောင်ရွက်ပေးသွားမယ်လို့ ဆိုပါတယ်။
အဲဒီအပြင် တာဝန်ထမ်းဆောင်နေတဲ့ဝန်ထမ်းတွေဟာ ကျွမ်းကျင်ပြီးတာဝန်သိတဲ့ဝန်ထမ်းကောင်းတွေဖြစ်လာစေဖို့ လိုအပ်တဲ့ပညာရပ်တွေနဲ့ လုပ်ငန်းခွင်ကျွမ်းကျင်မှုတွေကို သင်ကြားပို့ချပေးမှာဖြစ်လို့ ပြည်သူတွေအတွက် မှန်ကန်မျှတတဲ့အခွန်နဲ့အုပ်ချုပ်ရေးစနစ်ကို ဆက်တည်ဆောက်သွားမယ်လို့လည်းဆိုပါတယ်။
အာရက္ခအဆုံးအဖြတ်စစ်ပွဲမှာ အာရက္ခတပ်တော်(AA)ဟာ ပလက်ဝဒေသအပါအဝင်တဆယ့်ငါးမြို့နယ်ကို တိုက်ခိုက်သိမ်းပိုက်ထိန်းချုပ်ထားပြီးနောက် အာရက္ခပြည်သူ့တော်လှန်ရေးအစိုးရအဖြစ်အုပ်ချုပ်ရေးယန္တရားတွေဖော်ဆောင်နေပါတယ်။
အဲဒီအာရက္ခတပ်တော်ထိန်းချုပ်နယ်မြေတွေမှာ အာရက္ခပြည်သူ့တော်လှန်ရေးအစိုးရရဲ့အကောက်ခွန်နဲ့အခွန်ဌာနကဦးဆောင်ပြီး အခွန်၊အခတွေကောက်ခံနေတာဖြစ်ပါတယ်။
ဒါပေမယ့်အကောက်ခွန်နဲ့အခွန်ဌာနရဲ့ တရားဝင်ပြောဆိုချက်တွေနဲ့ကွဲလွှဲပြီး မြေပြင်မှာပိုမိုကောက်ခံမှုတွေရှိနေတယ်လို့ အာရက္ခပြည်သူတွေဝေဖန်ပြောဆိုနေကြပါတယ်။
အာရက္ခပြည်သူ့တော်လှန်ရေးအစိုးရရဲ့ အကောက်ခွန်နဲ့အခွန်ဌာနကဝန်ထမ်းတချို့ဟာ အခွန်ကောက်ခံရထားတဲ့ငွေတွေကို ကိုယ်ကျိုးအတွက်အသုံးပြုနေကြတာတွေ၊အဂတိလိုက်စားထားတဲ့အချက်အလက်တချို့ကို Border News Agency က လက်ခံရရှိထားပါတယ်။
