​Border News Agency
မြောက်ဦး၊ဩဂုတ် ၂၇။

​ဓာတုလက်နက်(Chemical Weapons) ဆိုတာ လူသားတွေဖန်တီးထားတဲ့အဆိပ်ဓာတ်ငွေ့၊ အရည်နဲ့အမှုန့်တွေဖြစ်ပြီး အမြောက်ကျည်၊ဒုံးကျည်၊ လေကြောင်းဗုံးကြဲမှုနဲ့ ဒရုန်းဗုံးသီးတွေကတဆင့် ပစ်ခတ်တိုက်ခိုက်လေ့ရှိပါတယ်။

အဲဒီအဆိပ်သင့်ပစ္စည်းတွေဟာ ခန္ဓာကိုယ်ရဲ့အဆုတ်၊ အရေပြား၊ မျက်လုံးနဲ့အမြှေးပါးတွေကတဆင့် အလွယ်တကူဝင်ရောက်နိုင်ပြီး ဦးနှောက်၊အာရုံကြောနဲ့ အသက်ရှူလမ်းကြောင်းစတဲ့ အင်္ဂါအဖွဲ့အစည်းတွေကို ပြင်းထန်စွာပျက်စီးစေနိုင်တာကြောင့် အာရက္ခပြည်သူ့ကျန်း မာရေးဌာနက အသိပညာပေးထုတ်ပြန်ထားပါတယ်။

​ဓာတုလက်နက်သုံးစွဲခံရကြောင်း သံသယဖြစ်နိုင်တဲ့လက္ခဏာတွေ

၁။​ထိခိုက်ဒဏ်ရာမရှိဘဲဗြုန်းဒိုင်းကြီး အဆိပ်သင့်လက္ခဏာပြတာ သို့မဟုတ် လူအများအပြားသေဆုံးတာ။

၂။​ရရှိထားတဲ့ဒဏ်ရာနဲ့မသက်ဆိုင်ဘဲ ပြင်းထန်တဲ့ဝေဒနာခံစားရတာ။

၃။​ပုံမှန်မဟုတ်တဲ့အနံ့၊အရည်၊အငွေ့တွေနဲ့ထိတွေ့ပြီးနောက် အဆိပ်သင့်လက္ခဏာတွေပေါ်လာတာ။

၄။​ကျွဲ၊နွား၊တိရစ္ဆာန်တွေ ပုံမှန်မဟုတ်ဘဲ အစုလိုက်အပုံလိုက်သေဆုံးတာ။

ပြသလေ့ရှိတဲ့အဆိပ်သင့်လက္ခဏာတွေ

အစပိုင်းမှာမျက်ရည်ကျတာ၊မျက်စိစပ်တာ၊မျက်သားရောင်တာ၊မျက်စိယာယီမမြင်ရတာ၊လည်ချောင်းနာတာနဲ့အသံဩလာတာတွေ ခံစားရနိုင်ပါတယ်။

အဲဒီအပြင်​နာရီပေါင်းများစွာကြာပြီးနောက် အရေပြားနီရဲရောင်ရမ်းပြီး အရည်ကြည်ဖုတွေထွက်လာတာ၊မကျက်နိုင်တဲ့အနာတွေဖြစ်တာ၊ချောင်းဆိုးပြီး အသက်ရှူရခက်ခဲလာတာစတဲ့လက္ခဏာတွေပြသလေ့ရှိပါတယ်။

​ဓာတုလက်နက်တိုက်ခိုက်ခံရရင် လိုက်နာရမယ့်ဆောင်ရန်၊ရှောင်ရန်တွေ

​ဓာတုလက်နက်နဲ့တိုက်ခိုက်ခံရတယ်လို့ သံသယရှိရင်စိတ်ကိုငြိမ်ငြိမ်ထားဖို့လိုအပ်ပါတယ်။

အဆိပ်ဓာတ်ငွေ့နဲ့ဝေးရာ ဟင်းလင်းပြင်လေတင်ဘက်နဲ့အမြင့်ပိုင်းနေရာတွေကို အမြန်ဆုံးရွှေ့ပြောင်းနေထိုင်ရပါမယ်။

အဝတ်အစားတွေရဲ့ ခြည်မျှင်တွေမှာ အဆိပ်တွေခိုအောင်းနေတတ်တာကြောင့် ဝတ်ဆင်ထားတဲ့အဝတ်အစားတွေကို ချက်ချင်းချွတ်ပြီး ပလတ်စတစ်အိတ်ထဲ လုံခြုံစွာထည့်သွင်းသိမ်းဆည်းရပါမယ်။

အဲဒီလိုအဝတ်အစားတွေကို ဖယ်ရှားလိုက်တာဟာ အဆိပ်ဓာတ်ကို ၈၀ ရာခိုင်နှုန်းခန့် လျှော့ချပေးနိုင်ပါတယ်။

အဲဒီအပြင်​ခန္ဓာကိုယ်ကိုဆေးကြောရာမှာ ရေနဲ့ဆပ်ပြာကိုအသုံးပြုပြီး “ဆေး – သုတ် – ဆေး”နည်းစနစ်အတိုင်းစနစ်တကျဆေးရပါမယ်။

အရေပြားပေါ်ရှိအဆိပ်တွေကိုစုပ်ယူနိုင်တဲ့ ပေါင်ဒါ သို့မဟုတ် လိမ်းဆေးတွေအသုံးပြုနိုင်ပြီး ရေကိုအလွန်အမင်းအများအပြားမသုံးရပါဘူး။

ရေအလွန်အကျွံသုံးရင် အဆိပ်တွေပိုမိုပြန့်နှံ့သွားနိုင်တာကြောင့် သတိပြုရပါမယ်။

မျက်လုံးမှာ ထိခိုက်ရင်သန့်ရှင်းတဲ့ရေ သို့မဟုတ် ၀.၉ ရာခိုင်နှုန်း ဆလိုင်း (0.9% Saline) နဲ့သာ ဆေးကြောရပါမယ်။

အဆိပ်သင့်လက္ခဏာမပြသေးရင်လည်း ထိတွေ့မှုရှိခဲ့ပါကနီးစပ်ရာ ဆေးရုံ၊ ဆေးခန်းတွေကို အမြန်ဆုံးသွားရောက်ပြသရပါမယ်။

အဲ​ဒီအသိပညာပေးဟာ စစ်ရေးပဋိပက္ခနယ်မြေတွေအတွင်း ပြည်သူတွေအနေနဲ့ မိမိကိုယ်ကို အကာအကွယ်ပေးနိုင်ဖို့၊ဓာတုအဆိပ်သင့်မှု လက္ခဏာတွေကို ကြိုတင်ရိပ်မိနိုင်ဖို့နဲ့ အသက်အန္တရာယ်ထိခိုက်မှုကို အတ်ဆိုးရွားဆုံးအဆင့်ထိမရောက်အောင် အရေးပေါ်ရှေးဦးပြုစုနည်းတွေကို စနစ်တကျလိုက်နာကျင့်သုံးနိုင်စေဖို့ရည်ရွယ်ပြီး အာရက္ခပြည်သူ့ကျန်းမာရေးဌာနက အသိပညာပေးနှိုးဆော်ထားတာဖြစ်ပါတယ်။