Border News Agency
ကျောက်တော်၊ ဩဂုတ် ၂၇။
အာရက္ခပြည်သူ့တော်လှန်ရေးအစိုးရရဲ့ အာရက္ခအမျိုးသားတက္ကသိုလ်၊နည်းပညာဌာနအောက်ရှိအာရက္ခနည်းပညာသိပ္ပံကျောင်းဟာ သင်တန်းကာလနှစ်နှစ်ကြာမယ့် မေဂျာလေးခုအတွက် သင်တန်းသားသစ်တွေကို စတင်ခေါ်ယူနေပါတယ်။
မြို့ပြအင်ဂျင်နီယာ (Civil Engineering)၊အီလက်ထရွန်နစ်အင်ဂျင်နီယာ (Electronics Engineering)၊ လျှပ်စစ်စွမ်းအားအင်ဂျင်နီယာ (Electrical Power Engineering) နဲ့ စက်မှုအင်ဂျင်နီယာ (Mechanical Engineering)ဘာသာရပ်တွေဖြစ်ပါတယ်။
အဲဒီသင်တန်းတွေကို အာရက္ခအထက်တန်းပညာအရည်အချင်းစစ်စာမေးပွဲ (ACSSE) အောင်မြင်ထားသူတွေ သို့မဟုတ် ၂၀၂၃ ခုနှစ်မှ ၂၀၂၅ ခုနှစ်ထိ တက္ကသိုလ်ဝင်စာမေးပွဲအောင်မြင်ထားတဲ့ ကျောင်းသား၊ကျောင်းသူတွေလျှောက်ထားနိုင်တာပါ။
အဲဒီအပြင် အရင်ကနည်းပညာတက္ကသိုလ် (TU) နဲ့အစိုးရနည်းပညာကောလိပ် (GTI)မှာသင်တန်းနှစ်အသီးသီးအောင်မြင်ထားတဲ့ ကျောင်းသားဟောင်းတွေအတွက်လည်း မေဂျာငါးခုနဲ့ ပညာဆက်သင်ကြားနိုင်အောင် စစ်တမ်းကောက်ယူမှုတွေပြုလုပ်သွားဦးမှာဖြစ်ပါတယ်။
အဲဒီသင်တန်းတက်ရောက်ချင်သူတွေဟာ လျှောက်လွှာတွေကိုသက်ဆိုင်ရာမြို့နယ်ပညာရေးရုံးတွေမှာထုတ်ယူပြီး လာမယ့်အောက်တိုဘာလ ၉ ရက်နေ့ နောက်ဆုံးထားကာ ပြန်ပေးပို့လျှောက်ထားရမှာဖြစ်ပါတယ်။
အာရက္ခအဆုံးအဖြတ်စစ်ပွဲမှာ အာရက္ခတပ်တော်(AA)ဟာ ပလက်ဝဒေသအပါအဝင် တဆယ့်ငါးမြို့နယ်ကို တိုက်ခိုက်သိမ်းပိုက်ထိန်းချုပ်ထားပြီးနောက် အာရက္ခပြည်သူတော်လှန်ရေးအစိုးရအဖြစ် အုပ်ချုပ်ရေးယန္တရားတွေဖော်ဆောင်နေပါတယ်။
အဲဒီအာရက္ခပြည်သူ့တော်လှန်ရေးအစိုးရဟာ အာရက္ခအမျိုးသားပညာရေးဌာနကိုဖွဲ့ထားပြီး အာရက္ခအမျိုးသားပညာရေးကို အကောင်အထည်ဖော်သင်ကြားပေးနေပါတယ်။
