Border News Agency
မြောက်ဦး၊ ဩဂုတ် ၂၇။
အာရက္ခပြည်သူ့တော်လှန်ရေးအစိုးရရဲ့ အာရက္ခပြည်သူ့ကျန်းမာရေးဌာနအောက်မှာရှိတဲ့ ပြည်သူ့ကျန်းမာရေးသင်တန်းကျောင်းက ပြည်သူ့ကျန်းမာရေးကြီးကြပ်နှစ်အပတ်စဉ် ၂ သင်တန်းအတွက်သင်တန်းသားသစ်တွေကို စတင်ခေါ်ယူနေပါတယ်။
အဲဒီသင်တန်းကို အသက်သုံးဆယ်မပြည့်သေးဘဲ အနည်းဆုံးအထက်တန်းတက္ကသိုလ်ဝင်တန်းအောင်မြင်ထားသူ၊ပြစ်မှုကင်းရှင်းပြီး အကျင့်စာရိတ္တကောင်းမွန်သူနဲ့ ကျန်းမာရေးကောင်းမွန်သူမည်သူမဆို လျှောက်ထားနိုင်တာပါ။
အဲဒီသင်တန်းပြီးရင် ပြည်သူ့ကျန်းမာရေးကြီးကြပ်နှစ်အဖြစ် ဘယ်နီးစပ်ရာဒေသမှာမဆို အနည်းဆုံးငါးနှစ်တာဝန်ထမ်းဆောင်နိုင်ရမှာဖြစ်ပါတယ်။
အဲဒီလျှောက်လွှာနဲ့အတူ နိုင်ငံသားမှတ်ပုံတင်မိတ္တူတစောင်၊ 4.5 cm x 4 cm ပတ်စ်ပို့ဓာတ်ပုံနှစ်ပုံ၊ပညာအရည်အချင်းအထောက်အထားနဲ့ မြို့နယ်၊တိုက်နယ်ပုလိပ်ရုံးမှထောက်ခံချက်ကို ပူးတွဲတင်ပြရမှာပါ။
အဲဒီလျှောက်လွှာတွေကို လာမယ့်စက်တင်ဘာလ ၁၀ ရက်နေ့ နောက်ဆုံးထားပြီး သက်ဆိုင်ရာမြို့နယ်ပြည်သူ့ကျန်းမာရေးဌာနသို့ ပေးပို့လျှောက်ထားရမှာဖြစ်ပါတယ်။
အဲဒီဝင်ခွင့်ရေးဖြေနဲ့နှုတ်မေးစာမေးပွဲတွေကို လာမယ့်စက်တင်ဘာလ ၁၈ ရက်နေ့မှာ ဖြေဆိုရမှာဖြစ်ပြီး ဖြေဆိုရမယ့်နေရာကို သက်ဆိုင်ရာမြို့နယ်ကျန်းမာရေးဌာနတွေမှာစုံစမ်းနိုင်ပါတယ်။
အဲဒီအပြင်ဌာနတခုခုမှာ ဝန်ထမ်းလုပ်ကိုင်နေသူဖြစ်ရင် သက်ဆိုင်ရာဌာနအကြီးအကဲရဲ့ထောက်ခံချက်ပူးတွဲပါရှိရမှာပါ။
အဲဒီရွေးချယ်ခံရသူတွေဟာ မိမိစရိတ်နဲ့ရှစ်လကြာသင်တန်းကို ပြီးဆုံးတဲ့ထိတက်ရောက်ရမှာဖြစ်ပြီး ဝန်ထမ်းအတည်အဖြစ် တာဝန်ထမ်းဆောင်ဖို့ ခံဝန်ကတိလက်မှတ်ရေးထိုးရမှာဖြစ်ကာ ကျန်းမာရေးစောင့်ရှောက်မှုလုပ်ငန်းတွေကို တာဝန်ယူဆောင်ရွက်ရမှာဖြစ်ပါတယ်။
အာရက္ခအဆုံးအဖြတ်စစ်ပွဲမှာ အာရက္ခတပ်တော်(AA)ဟာ ပလက်ဝဒေသအပါအဝင်တဆယ့်ငါးမြို့နယ်ကို တိုက်ခိုက်သိမ်းပိုက်ထိန်းချုပ်ထားပြီးနောက် အာရက္ခပြည်သူ့တော်လှန်ရေးအစိုးရအဖြစ်အုပ်ချုပ်ရေးယန္တရားတွေဖော်ဆောင်နေပါတယ်။
