Border News Agency
ကျောက်တော်၊ သြဂုတ် ၃၀။
အာရက္ခပြည်သူ့တော်လှန်ရေးအစိုးရဟာ ဒေသတွင်းလူကုန်ကူးမှုနဲ့ ကျားဖြန့်အန္တရာယ်တွေကိုတားဆီးကာကွယ်နှိမ်နင်းနေတယ်လို့ အာရက္ခမှုခင်းနဲ့ဆက်စပ်သတင်းထုတ်ပြန်ရေးအဖွဲ့က ဩဂုတ်လ ၂၉ ရက်၊မနေ့ကထုတ်ပြန်ပါတယ်။
မြန်မာနိုင်ငံရဲ့ စစ်ရေး၊နိုင်ငံရေးမတည်ငြိမ်မှုနဲ့ စီးပွားရေးကျပ်တည်းမှုတွေကို အခွင့်ကောင်းယူပြီး လူကုန်ကူးဂိုဏ်းတွေက ပြည်သူတွေကို အလုပ်အကိုင်မက်လုံးပေးလှည့်ဖြားကာ ထိုင်းနဲ့တရုတ်နိုင်ငံတွေဆီ တရားမဝင်ပို့ဆောင်တာ၊အတင်းအဓမ္မခိုင်းစေတာနဲ့ ကျားဖြန့်လုပ်ငန်းတွေဆီ ရောင်းစားတာတွေလုပ်နေကြတာပါ။
အဲဒီအပြင် ရက္ခိုင်အမျိုးသားအဖွဲ့ချုပ်/အာရက္ခတပ်တော် (ULA/AA) ရဲ့ အမျိုးသားကာကွယ်ရေးဆိုင်ရာ အရေးပေါ်ပြဋ္ဌာန်းချက် (NDEP)ကိုရှောင်ရှားဖို့ ပွဲစားတွေနဲ့နယ်စပ်ဖြတ်ကျော်ထွက်ခွာစဉ်လိမ်လည်ခေါင်းပုံဖြတ်ခံရတာ၊အာဏာသိမ်းစစ်တပ်ဆီဖမ်းဆီးခံရပြီး စစ်မှုထမ်းခိုင်းခံရတာနဲ့ တောတောင်တွေအတွင်း အသက်အန္တရာယ်ကြုံတွေ့ရတာတွေဖြစ်ပေါ်နေပါတယ်။
အာရက္ခပြည်သူ့တော်လှန်ရေးအစိုးရဟာ NDEP အရ အရွယ်ရောက်သူတွေကို စစ်မှုထမ်းဖို့ သတ်မှတ်ထားပြီး အရေးပေါ်ကာလအတွင်း နယ်စပ်မှတရားမဝင်ထွက်ခွာသူတွေကို စစ်ဆေးကာ အကျုံးဝင်သူတွေကို စစ်မှုထမ်းစေတာ၊အကျုံးမဝင်သူတွေကို ပြစ်ဒဏ်ပေးပြန်လွှတ်တာအပြင် လူကုန်ကူးပွဲစားတွေကိုလည်း ဥပဒေအတိုင်းအရေးယူနေတယ်လို့ ဆိုပါတယ်။
အဲဒီလိုထိန်းသိမ်းအရေးယူထားသူတွေထဲက လူကုန်ကူးပွဲစား ရမ်းဗြဲမြို့နယ်၊ကျောက်ဆောက်ရွာမှ ဦးဇော်ဇော်မိုးမှာ အသက်ရှူမဝတာ၊ မောပန်းတာတွေကြောင့် ဆေးကုသမှုခံယူနေချိန် ဩဂုတ်လ ၂၅ ရက်နေ့မှာ ကွယ်လွန်သွားခဲ့တယ်လို့ဆိုပါတယ်။
အာရက္ခပြည်သူ့တော်လှန်ရေးအစိုးရရဲ့ ဒီလပ်ဌာနဟာ ၂၀၂၆ ခုနှစ်၊ဇန်နဝါရီလမှ ဇူလိုင်လထိခုနှစ်လတာအတွင်း လူကုန်ကူးမှုအပါအဝင် ပြည်ပအလုပ်အကိုင်ဆိုင်ရာဥပဒေချိုးဖောက်မှုသုံးဆယ်ငါးမှုကို အရေးယူနိုင်ခဲ့ပြီး ပြည်သူတွေဟာ အလုပ်အကိုင်မက်လုံးတွေကို သတိပြုရှောင်ရှားကြဖို့ တိုက်တွန်းထားပါတယ်။
