Border News Agency
ကျောက်တော်၊ အောက်တိုဘာ ၂။
အာရက္ခတပ်တော်(AA)ထိန်းချုပ်ထားတဲ့ ကျောက်တော်မြို့ကို အာဏာသိမ်းစစ်တပ်လေကြောင်းတိုက်ခိုက်လို့ ဒဏ်ရာရသူတွေထဲက ဒဏ်ရာပြင်းထန်တဲ့အမျိုးသမီးတဦး ဆေးကုသမှုခံယူနေစဉ်သေဆုံးသွားပါတယ်။
အဲဒီကျောက်တော်မြို့၊ ပြည်တော်သာရပ်ကွက်မှ အသက်ငါးဆယ်ငါးနှစ်အရွယ်ဒေါ်ရွှေရီဖြစ်ပြီး ဝမ်းဗိုက်မှာဗုံးစထိမှန်ဒဏ်ရာနဲ့ စက်တင်ဘာလ ၃၀ ရက်၊ည ၁၁ နာရီအချိန်ခန့်မှာ သေဆုံးသွားခဲ့တာဖြစ်ပါတယ်။
ကျောက်တော်မြို့နဲ့ အနီးဝန်းကျင်ကျေးရွာတွေကို ပြီးခဲ့တဲ့ စက်တင်ဘာလ၂၅ ရက်၊ ညသန်းခေါင်အချိန်က အာဏာသိမ်းစစ်တပ်လေကြောင်းတိုက်ခိုက်ခဲ့တာကြောင့် ဆယ်နှစ်အောက်ကလေးတဦးအပါအဝင် အရပ်သားခုနှစ်ဦး ဒဏ်ရာရရှိခဲ့တာပါ။
အဲဒီကျောက်တော်မြို့ရှိ အိန္ဒိယဈေးနဲ့ ကစ္ဆပနဒီတံတားကို စက်တင်ဘာလ ၂၈ ရက်နေ့က အာဏာသိမ်းစစ်တပ်က လေကြောင်းတိုက်ခိုက်ခဲ့တာကြောင့် အရပ်သားငါးဆယ်ဦးသေဆုံးပြီး ငါးဆယ်ခုနှစ်ဦးဒဏ်ရာရရှိခဲ့ပါတယ်။
အာဏာသိမ်းစစ်တပ်ဟာ မြေပြင်တိုက်ပွဲတွေမှာ အပြင်းအထန်စစ်ရှုံးနေတာကြောင့် အာရက္ခတပ်တော်ထိန်းချုပ်မြို့တွေကို ရည်ရွယ်ချက်ရှိရှိပစ်မှတ်ထားကာ စစ်ရာဇဝတ်မှုတွေဆက်တိုက်ကျူးလွန်နေတာဖြစ်ပါတယ်။
