Border News Agency
ထိုင်း၊ နိုဝင်ဘာ ၁၉။
ထိုင်းနိုင်ငံမှာရောက်ရှိနေကြတဲ့ မြန်မာနိုင်ငံက နေရပ်စွန့်ခွာ ဒုက္ခသည်တွေ အလုပ်ရရှိရေး ဂျပန်နိုင်ငံက ကူညီသွားမယ်လို့ အပြည်ပြည်ဆိုင်ရာ အလုပ်သမားရေးရာအဖွဲ့ (ILO) က ထုတ်ပြန်ပါတယ်။
ထိုင်းရှိ မြန်မာဒုက္ခသည်တွေကို သင့်တော်တဲ့ အလုပ်အကိုင်တွေ တိုးချဲ့ဖို့ ဂျပန်နိုင်ငံနဲ့ ILO အကြား နိုဝင်ဘာလ ၁၇ ရက်မှာ သဘောတူညီချက် လက်မှတ်ရေးထိုးခဲ့ကြပြီး ဂျပန်အပြည်ပြည်ဆောင်ရွက်ရေးအေဂျင်စီ (JICA) က ရန်ပုံငွေပံ့ပိုးပေးမှာဖြစ်ပါတယ်။
JICA ရန်ပုံငွေနဲ့ နှစ်နှစ်တာ ဆောင်ရွက်မယ့် မြန်မာနေရပ်စွန့်ခွာသူများအတွက် အလုပ်အကိုင်ပံ့ပိုးမှုစနစ် အားကောင်းလာစေရေး ယန်းငွေလေးရာခုနှစ်ဆယ့်ရှစ်သန်းတန် စီမံချက်ကို ILO က ထိုင်းအလုပ်သမားဝန်ကြီးဌာန၊ အခြားသက်ဆိုင်ရာ ဝန်ကြီးဌာနတွေနဲ့ ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး (UNHCR) တို့ ပူးပေါင်းဆောင်ရွက်သွားမှာ ဖြစ်ပါတယ်။
အဲဒီစီမံကိန်းကတဆင့် နေရပ်စွန့်ခွာသူတွေနဲ့ မိသားစုဝင် လေးထောင့်ငါးရာဦးကို လုပ်ငန်းခွင်မဝင်မီ သင်တန်းတွေ ပို့ချပေးတာ၊ ဒုက္ခသည်စခန်းတွေအတွင်း နည်းပြသင်တန်းတွေ ပေးခြင်း၊ အလုပ်အကိုင် ချိတ်ဆက်ပေးတဲ့ ဝန်ဆောင်မှုတွေ အားကောင်းလာစေဖို့နဲ့ ဂျပန်ကုမ္ပဏီ အလုပ်ရှင်တွေနဲ့ ချိတ်ဆက်ဆောင်ရွက်မှုတွေ တိုးလုပ်သွားမှာဖြစ်ပါတယ်။
စီမံကိန်းကို ယာယီခိုလှုံရေးစခန်းတွေ တည်ရှိရာ တာ့ခ်၊ မယ်ဟောင်ဆောင်၊ ကန်ချနဘူရီနဲ့ ရတ်ချဘူရီတွေမှာသာမက ဂျပန်စီးပွားရေးလုပ်ငန်း အများအပြားရှိရာ ချွန်ဘူရီ၊ ရယောင်နဲ့ ကန်ချနဘူရီခရိုင်တွေမှာလည်း ဆောင်ရွက်သွားမှာဖြစ်ပါတယ်။
ထိုင်း-မြန်မာ နယ်စပ်တလျှောက် ယာယီခိုလှုံရေးစခန်းကိုးခုမှာ လူဦးရေခုနှစ်သောင်းခုနစ်ထောင်ခန့် နေထိုင်နေကြပြီး ၂၀၂၅ ခုနှစ်၊ အောက်တိုဘာလ ၁ ရက်ကစပြီး ဒုက္ခသည်တွေကို ရွှေ့ပြောင်းအလုပ်သမားအဖြစ် ထိုင်းအစိုးရက အလုပ်လုပ်ကိုင်ခွင့်ပြုခဲ့တာဖြစ်ပါတယ်။







