Border News Agency
ကလော၊ နိုဝင်ဘာ ၁၉။
ရှမ်းပြည်၊ ကလောမြို့နဲ့ ရန်ကုန်တိုင်း၊ ဒေါပုံမြို့နယ်တို့မှာ ဒေသကာလတန်ဖိုး စုစုပေါင်းငွေကျပ်တစ် ဒသမ ငါးဘီလီယံကျော် တန်ဖိုးရှိတဲ့ဘိန်းစိမ်းနဲ့ စိတ်ကြွဆေးပြားတွေကို ဖမ်းဆီးရမိခဲ့တယ်လို့ မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့ (CCDAC) က နိုဝင်ဘာလ ၁၉ ရက်၊ဒီနေ့ ထုတ်ပြန်ပါတယ်။
အဲဒီကလောမြို့၊ ကလောဘူတာစင်္ကြန်မှာ နိုဝင်ဘာလ ၁၆ ရက်နေ့က အသက်ငါးဆယ်အရွယ် သန်းထွန်းနဲ့ အသက် ငါးဆယ့်သုံးနှစ်အရွယ် မခိုင်ခိုင်မော်တို့နှစ်ဦးသယ်ဆောင်လာတဲ့ လက်ဆွဲခြင်းတွေအတွင်းမှ ဒေသကာလတန်ဖိုး ငွေကျပ်တရာ့နှစ်ဆယ့်ခုနှစ် ဒသမခြောက်သိန်းတန်ဖိုးရှိ ဘိန်းစိမ်းသုံးဆယ့်တစ်ဒသမ ကိုးကီလိုနဲ့ လက်ကိုင်ဖုန်းနှစ်လုံးတို့ကို ဖမ်းဆီးရမိခဲ့တာဖြစ်ပါတယ်။
အဲဒီအပြင် နိုဝင်ဘာလ ၁၃ ရက်နေ့ကလည်း ရန်ကုန်တိုင်း၊ ဒေါပုံမြို့နယ်၊ သင်္ဘောကျင်းရပ်ကွက်၊ မြို့မလမ်းမှာ မောင်အေးထွန်းနဲ့ ထွန်းချေတို့မောင်းနှင်လာတဲ့ မော်တော်ယာဉ်ပေါ်မှ ဒေသကာလတန်ဖိုး ငွေကျပ် တစ်ဒသမငါးသုံးဘီလီယံတန်ဖိုးရှိ စိတ်ကြွဆေးပြား ဆယ်သိန်းနှစ်သောင်းပြားနဲ့ လက်ကိုင်ဖုန်း သုံးလုံးတို့ကို ဖမ်းဆီးရမိခဲ့ပါတယ်။
အဲဒီအမှုရဲ့ စစ်ဆေးပေါ်ပေါက်ချက်အရ စိတ်ကြွဆေးပြား သယ်ဆောင်ရောင်းဝယ်ရာမှာ ပူးပေါင်းပါဝင်သူ ကျော်ဝင်းကို မင်္ဂလာတောင်ညွန့်မြို့နယ်၊ ကျီတောရပ်ကွက်မှာ ထပ်မံဖမ်းဆီးရမိခဲ့ပါတယ်။
အဲဒီကလောမြို့နဲ့ ဒေါပုံမြို့နယ်တို့မှာ ဖမ်းဆီးရမိသူ စုစုပေါင်းငါးဦးကို သက်ဆိုင်ရာမြို့မရဲစခန်းအသီးသီးမှာ မူးယစ်ဆေးဝါးနဲ့ စိတ်ကိုပြောင်းလဲစေသော ဆေးဝါးဆိုင်ရာဥပဒေအရ အမှုဖွင့်အရေးယူထားပြီး ကွင်းဆက်တရားခံတွေကို ဆက်လက်ဖော်ထုတ်နေပါတယ်။











