Border News Agency
ကျောက်တော်၊ ဇူလိုင် ၂၉။
အာရက္ခဒေသက တောင်သူလယ်သမားတွေဟာ လယ်ယာစိုက်ပျိုးရေးအတွက်ဓာတ်မြေသြဇာတွေ အကူအညီလိုအပ်နေကြတယ်လို့ တောင်သူလယ်သမားတွေကဆိုကြပါတယ်။
အာရက္ခဒေသက တောင်သူတွေရဲ့စိုက်ပျိုးထားတဲ့စပါးပင်တွေဟာ ဓာတ်မြေသြဇာလိုအပ်လာပေမယ့် ငွေကြေးအခက်အခဲတွေကြောင့် ဝယ်ယူမသုံးစွဲနိုင်တာမို့ဓာတ်မြေသြဇာအကူအညီတွေလိုအပ်နေတာလို့ ဆိုကြပါတယ်။
“စပါးပင်တွေက အရွယ်ရောက်နေတဲ့ ကာလရောက်နေပြီ။ဓာတ်မြေသြဇာတွေ ကျွေးဖို့လိုအပ်နေပြီ။ဈေးတက်နေတော့ မဝယ်နိုင်တော့ဘူး။လယ်စလုပ်ကတည်းကရှိသမျှအရင်းအနှီးတွေထည့်လုပ်ထားတာ။ကုန်သွားပြီ။ဓာတ်မြေသြဇာအကူညီလိုအပ်နေပါတယ်” လို့ ကျောက်တော်မြို့နယ်ရှိ လယ်သမားတဦးက Border News Agency ကိုပြောပါတယ်။
အဲဒီအပြင် တောင်သူလယ်သမားတွေမှာ စပါးစိုက်ပျိုးချိန်ကနေ ပျိုးပင်ကာလအထိ မိုးအဆက်မပြတ်ရွာသွန်းလို့ ရေကြီးရေလျံပြီးစပါးပင်တွေရှင်သန်မှုအားနည်းတာမို့ဓာတ်မြေသြဇာအချိန်မီထည့်ပေးဖို့ လိုအပ်နေတာလို့ လယ်သမားတွေကဆိုကြပါတယ်။
ဓာတ်မြေသြဇာ အချိန်မီထည့်သွင်းတာဟာအထွက်နှုန်းတိုးဖို့အတွက် မဖြစ်မနေလိုအပ်တယ်လို့ တောင်သူလယ်သမားတွေကဆိုပါတယ်။
“ဓါတ်မြေသြဇာမထည့်ရင် စပါးတွေကအထွက်နှုန်းကောင်းမှာမဟုတ်ဘူး။ အပင်တွေအားနည်းတော့အပင်မသန်ရင်သီးနှံလည်းဖျင်းသွားတာရှိတယ်။ဓါတ်မြေသြဇာကထည့်ပေးဖို့လိုအပ်နေပေမယ့်ဓါတ်မြေသြဇာမထည့်နိုင်ကြဘူး။ဈေးနှုန်းတွေကမြင့်တက်နေတော့ တတ်နိုင်တဲ့သူတွေဘဲထည့်ကြတယ်။ဒါတောင်လယ်ဧကတရာလောက်မှာနို့ဆီဘူးနှစ်ဘူးလောက်ပဲထည့်ကြတာ” လို့ တောင်
သူလယ်သမားတဦးက Border News Agency ကိုပြောပါတယ်။
အာရက္ခဒေသမှာ မိုးတွင်းကာလဓာတ်မြေဩဇာအဖြူတအိတ်ကို နှစ်သိန်း၊ပေါင်းသေပင်ကောင်းဓါတ်မြေသြဇာတအိတ်ကိုသုံးသိန်းခွဲ၊သုံးမျိုးစပ်ဓါတ်မြေဩဇာတအိတ်ကို ငါးသိန်းအထိ ဈေးနှုန်းရှိနေပါတယ်။
တိုက်ပွဲတွေမဖြစ်ခင်က သံကွင်းဓါတ်မြေသြဇာအမျိုးအစားမှာကျပ်ကိုးသောင်းကျော်၊ယူရီးယားဓါတ်မြေသြဇာ အဖြူအမျိုးအစားမှာကိုးသောင်းခွဲ၊ပေါင်းသေပင်ကောင်းအမျိုးအစားမှာခြောက်သောင်းကျပ်ဈေးနှုန်းသာ ရှိနေခဲ့တာဖြစ်ပါတယ်။
အာရက္ခအဆုံးအဖြတ်စစ်ပွဲစတင်တဲ့ ၂၀၂၃ ခုနှစ်ကနေ စစ်ကောင်စီက ကုန်းလမ်းရေလမ်းတွေကို ပိတ်ဆို့ထားတာမို့ ကုန်ပစ္စည်းတွေမဝင်တာကြောင့် ကုန်စျေးနှုန်းအဆမတန်မြင့်တက်ပြီးတောင်သူလယ်သမားတွေဟာ လယ်ယာမြေတွေမှာဓါတ်မြေသြဇာတွေမထည့်နိုင်ဘူးလို့ဆိုကြပါတယ်။
အဲဒီလိုဓါတ်မြေသြဇာအချိန်မီမထည့်နိုင်တဲ့အတွက်တောင်သူတွေဟာ နှစ်တိုင်းစပါးအထွက်နှုန်းနည်းပါးတဲ့ခက်ခဲမှုတွေနဲ့ ကြုံနေကြရတယ်လို့ ဆိုကြပါတယ်။
အာရက္ခဒေသမှာ စပါးစိုက်လယ်ယာမြေဧက တဆယ့်နှစ်သိန်းကျော်ရှိပေမယ့် ဒီနှစ်မှာ ထွန်ယက်စိုက်ပျိုးနေကြတဲ့ လယ်ယာမြေတွေဟာ ထက်ဝက်ပင်မရှိနိုင်ဘူးလို့ တောင်သူလယ်သမားတွေက ခန့်မှန်းထားကြပါတယ်။
အဲဒီလိုစပါးစိုက်လယ်ယာမြေပမာဏ လျော့နည်းသွားတာဟာ လယ်ယာလုပ်ငန်းသုံး သွင်းအားစုစျေးကြီးတာ၊ အလုပ်သမားခစျေးမြင့်တာ၊ လယ်ယာထွက် စပါးနဲ့ ဆန်တွေ ရောင်းမထွက်တာ၊ ဒေသမတည်ငြိမ်တာတွေကြောင့်ဖြစ်တယ်လို့လည်း တောင်သူလယ်သမားတွေကဆိုကြပါတယ်။
