Border News Agency
မန္တလေး၊ နိုဝင်ဘာ ၁၃။
မန္တလေးတိုင်း၊ စဉ့်ကူးမြို့နယ်မှာ စစ်ဘေးရှောင်တွေနေထိုင်တဲ့ စာသင်ကျောင်းကို စစ်ကော်မရှင်တပ်က လေကြောင်းတိုက်ခိုက်လို့ အရပ်သားငါးဦးသေဆုံးပြီး ငါးဦးဒဏ်ရာရသွားတယ်လို့ ဒေသခံတွေကဆိုကြပါတယ်။
အဲဒီစဉ့်ကူးမြို့နယ်၊ မာလဲကျေးရွာကို နိုဝင်ဘာ ၁၂ရက် မနေ့ ညနေ ၅ နာရီအချိန်ခန့်က စစ်ကော်မရှင်တပ်ရဲ့ တံတားဦးလေတပ်မှ စစ်ဘေးရှောင်တွေနေတဲ့ စာသင်ကျောင်းကို ရွယ်ရည်ချက်ရှိရှိ လေကြောင်းတိုက်ခိုက်ခဲ့တယ်လို့ဆိုပါတယ်။
အဲဒီလိုလေကြောင်းတိုက်ခိုက်ခဲ့တာကြောင့် အရပ်သားငါးဦးသေဆုံးပြီး ငါးဦးဒဏ်ရာရသွားခဲ့သလို စာသင်ကျောင်းအပါအဝင် အဆောက်အအုံသုံးလုံးပျက်စီးသွားတယ်လို့ ဆိုပါတယ်။
အဲဒီမာလဲကျေးရွာစာသင်ကျောင်းမှာ မတ္တရာမြို့နယ်မှဒေသခံတွေ စစ်ဘေးရှောင်နေတာဖြစ်တယ်လို့ ဒေသခံတွေကဆိုကြပါတယ်။
စစ်ကော်မရှင်တပ်ဟာ စဉ့်ကူးမြို့နယ်၊ ရွှေပြည်ကျေးရွာစာသင်ကျောင်းနဲ့ ညောင်ကုန်းကျေးရွာကို နိုဝင်ဘာလ ၇ ရက်နေ့ကလည်း လေကြောင်းတိုက်ခိုက်ခဲ့တာကြောင့် အရပ်သားလေးဦးသေဆုံးပြီး အများအပြားဒဏ်ရာရခဲ့ပါတယ်။
စစ်ကော်မရှင်တပ်ဟာ တော်လှန်ရေးတပ်တွေထိန်းချုပ်ထားတဲ့နေရာတွေကို လေကြောင်းတိုက်ခိုက်တာတွေ နေ့စဉ်ပြုလုပ်နေတာမို့ အရပ်သားပြည်သူတွေ သေဆုံး၊ ဒဏ်ရာရနေကြပါတယ်။
